Хоразм вилояти Урганч шаҳрида 17 ёшли боланинг кўп қаватли уйдан тушиб кетгани юзасидан текширув ҳаракатлари олиб борилмоқда. Бу ҳақда Бош прокуратура матбуот хизмати бошлиғи маълум қилди.
Ижтимоий тармоқларда тарқалган видеода юқори қаватдан тушиб кетган бола автотураргоҳдаги Captiva устига тушганини кўриш мумкин.
Қайд этилишича, Урганч шаҳрида 2007 йилда туғилган вояга етмаган бола кўп қаватли уйнинг 5-қаватидан автомашина устига тушган ҳолати юзасидан прокуратура томонидан терговга қадар текширув ҳаракатлари олиб борилмоқда.
Ҳозирда жабрланувчи шифохонага ётқизилиб, унга зарур тиббий ёрдам кўрсатилмоқда. Содир бўлган ҳодисанинг сабаблари аниқланмоқда, — деб ёзади Ҳаёт Шамсутдинов.
Юқори қаватдан тушиб кетиш ҳолатлари
2022 йил июнь ойида Самарқанд шаҳридаги кўп қаватли бинонинг балкон қисмидан 1,5 ёшли қизча йиқилиб тушиб, вафот этганди. Шунингдек, Тошкентдаги кўп қаватли уйнинг 11-қаватидан 1,5 яшар бола тушиб кетгани ҳақида хабар қилинган эди. 2022 йил декабрда эса Россиянинг Санкт-Петербург шаҳри Петроградский туманида ўзбекистонлик ишчи 7-қаватдан тушиб кетиб, вафот этгани, шу йилнинг апрель ўрталарида эса Тошкент шаҳри Бектемир туманидаги 289-мактабда 11-синф ўқувчиси 3-қаватдан тушиб кетгани тўғрисида хабар берилганди.
Изоҳ (0)