Тошкент вилояти Чирчиқ шаҳрида 26 ёшли йигит юқори қаватдан ўзини ташлаб юборди. Бу ҳақда Бош прокуратура матбуот котиби хабар берди.
Маълум қилинишича, 9 июль куни соат 09:20 ларда Қорақалпоғистоннинг Амударё туманида туғилиб, Чирчиқ шаҳар Конструкторчилар даҳасидаги 9-уйда ота-онаси ва синглиси билан бирга яшаган 26 ёшли Д.Р. шу уйнинг 8-қаватидан ўзини ташлаб юборган. У олган тан жароҳати оқибатида вафот этган.
Дастлабки маълумотларга кўра, марҳум Д.Р. сўнгги беш йил давомида оила аъзолари билан биргаликда Россияда ишлаб, 2023 йилнинг май ойи бошида Ўзбекистонга қайтиб келган. Шу кунгача, Бўстонлиқ туманида оиласига тегишли бўлган дала ҳовлида қурилиш ишлари билан банд бўлган.
Бош прокуратурага кўра, ҳолат юзасидан терговга қадар текширув ҳаракатлари олиб борилмоқда. “Воқеа содир бўлгунга қадар йигитда (марҳум) руҳий ҳолат бузилиши кузатилган”, — дейилади муносабатда.
Юқори қаватдан тушиб кетиш ҳолатлари
2022 йил июнь ойида Самарқанд шаҳридаги кўп қаватли бинонинг балкон қисмидан 1,5 ёшли қизча йиқилиб тушиб, вафот этганди. Шунингдек, Тошкентдаги кўп қаватли уйнинг 11-қаватидан 1,5 яшар бола тушиб кетгани ҳақида хабар қилинган эди. 2022 йил декабрда эса Россиянинг Санкт-Петербург шаҳри Петроградский туманида ўзбекистонлик ишчи 7-қаватдан тушиб кетиб, вафот этгани, шу йилнинг апрель ўрталарида эса Тошкент шаҳри Бектемир туманидаги 289-мактабда 11-синф ўқувчиси 3-қаватдан тушиб кетгани тўғрисида хабар берилганди.
Изоҳ (0)