Тошкент шаҳрида кўп қаватли уйлардан бирида яшовчи 6 ёшли бола деразадан тушиб кетди. Бу ҳақда “Миллар” информацион дастурида маълум қилинди.
Қайд этилишича, бола яшайдиган хонадонда ҳимоя панжаралари бўлмаган. Бола дўстлари чақиргани сабаб дераза олдига келган. Аввалига пастга қарашга бўйи етмаган, шундан кейин стул олиб келиб, чақираётган дўстларига жавоб қайтармоқчи бўлган. Бироқ бутун гавдасини дераза ташқарисига чиқарган бола мувозанатни йўқотиб, тушиб кетган.
Шифокорларнинг сўзларига кўра, бола ўта оғир ҳолатда шифохонага олиб келинган. Унда нафас, юрак етишмовчилиги кузатилган, зудлик билан стандарт даволаш муолажалари амалга оширилган.
Текшириб кўрилганида, асосий жароҳат бош мия гематомаси экани маълум бўлган. Мутахассислар операция орқали қон қуйилишини бартараф этган.
Юқори қаватдан тушиб кетиш ҳолатлари
2022 йил июнь ойида Самарқанд шаҳридаги кўп қаватли бинонинг балкон қисмидан 1,5 ёшли қизча йиқилиб тушиб, вафот этганди. Шунингдек, Тошкентдаги кўп қаватли уйнинг 11-қаватидан 1,5 яшар бола тушиб кетгани ҳақида хабар қилинган эди. 2022 йил декабрда эса Россиянинг Санкт-Петербург шаҳри Петроградский туманида ўзбекистонлик ишчи 7-қаватдан тушиб кетиб, вафот этгани, шу йилнинг апрель ўрталарида эса Тошкент шаҳри Бектемир туманидаги 289-мактабда 11-синф ўқувчиси 3-қаватдан тушиб кетгани тўғрисида хабар берилганди.
Изоҳ (0)