Литвада 12 май куни президентлик сайловларининг биринчи босқичи бўлиб ўтди. Унда амалдаги президент Гитанас Науседадан ташқари етти нафар номзод қатнашди. Иккинчи босқичда президент ва бош вазир Ингрида Шимоните беллашади. Бу ҳақда Deutsche Welle хабар берди.
Кўпчилик овозларни санаб чиқиш натижаларига кўра, Науседа 44 фоиз, Шимоните эса 19 фоиз овоз олган. Сайловда давомад 59,4 фоизни ташкил этган.
Ҳа, мен биринчи турда ғалаба қозонишни хоҳлардим. Бироқ иккинчи турда курашишга тайёрман ва буни уддалай оламан деб ўйлайман, — деган Науседа.
Шимоните, ўз навбатида, иккинчи босқичга ўтишини қуйидагича изоҳлаган:
Ушбу босқичдаги асосий мақсадим иккинчи босқичга чиқиш эди ва бунга эришилди деб ҳисоблайман, — деган у.
Литва президентлигига сайловда жами саккиз нафар номзод иштирок этди. Улар орасида ҳуқуқшунос Игнас Вегеле, Литва Сеймининг собиқ депутати антисемитизм баёнотлари туфайли мандатдан маҳрум қилинган Ремигиюс Жемайтайтис ва бошқалар бор эди.
Литвада сайловларга параллел равишда референдум ҳам ўтказилмоқда
Литвада президентлик сайловлари билан бир вақтда қўшфуқароликни қонунийлаштириш бўйича референдум бўлиб ўтмоқда. Бунинг учун конституцияни ўзгартириш керак. Янги норма тасдиқланиши учун уни сайлов ҳуқуқига эга бўлган мамлакат фуқароларининг камида 50 фоизи қўллаб-қувватлаши лозим.
1895 та сайлов участкасидан 1629 тасида сайлов бюллетенларини санаб чиқиш натижаларига кўра, сайловчиларнинг 71,6 фоизи икки фуқароликни ёқлаб, 26,1 фоизи қарши чиққан.
Изоҳ (0)