Грузия парламентининг Ҳуқуқ қўмитаси мамлакатда давом этаётган норозилик намойишлари ва Европа Иттифоқининг танқидлари фонида хорижий агентлар тўғрисидаги қонун лойиҳасини учинчи ўқишда маъқуллади. Бу ҳақда тегишли манбаларга таяниб, Deutsche Welle хабар берди.
Қўмита йиғилиши роппа-роса икки дақиқада якунланган.
Биз, мухолифатчилар, ҳужжатни икки дақиқада имзоладик, — деди мухолифатчи депутатлардан бири.
1 май куни Грузия парламенти “Хорижий агентлар тўғрисида”ги қонун лойиҳасини иккинчи ўқишда қабул қилган эди, 83 депутат уни қўллаб-қувватлаган, 23 депутат қарши чиққан.
Ҳукмрон “Грузия орзуси” партияси қонунни май ойи ўрталарига қадар кучга киритиш ниятида. Қонун молиялаштиришнинг камида 20 фоизини хориждан оладиган ташкилотларни расмий рўйхатдан ўтказишни талаб этади.
Танқидчилар ҳужжатда Россиянинг “хорижий агентлар” қонуни билан яққол ўхшашликларни кўрмоқда, бу эса Россия расмийларига танқидий оммавий ахборот воситалари ва ташкилотларга нисбатан кескин чоралар кўриш имконини берган.
Грузия ҳукумати бу қонун лойиҳаси давлат суверенитетини мустаҳкамлаш учун муҳим эканини даъво қилмоқда.
Грузия бош вазири Ираклий Кобахидзе ҳукмрон партия ушбу қонуннинг қабул қилинишига қарши бўлган президент Саломе Зурабишвилининг ветосини енгиб ўта олишига ишонч билдирган.
Изоҳ (0)