12 май куни Шимолий Македониянинг биринчи аёл президенти сифатида қасамёд қилган Гордана Силжановска-Давкова қўшни Греция билан дипломатик можарога сабаб бўлди. Бу ҳақда Associated Press хабар берди.
Мамлакат парламентида ўтказилган маросимда Силжановска-Давкова ўз мамлакатининг конституциявий номини Шимолий Македония эмас, Македония деб атади. Янги сайланган президент нутқининг асосий қисмини аёллар ва уларнинг жамиятдаги ролига бағишлаб, мамлакатни “феминизациялаш” ва “европалаштириш”га ваъда берди.
“Биз аёллар ёрдамида сиз, эркак сиёсатчилар, ҳам ўзгаради ва Македония муносиб яшаш жойига айланади”, — деди у.
Бу Греция элчиси София Филиппидани инаугурация маросимини тарк этишга мажбур қилди.
Кейинроқ Греция Ташқи ишлар вазирлиги янги президентнинг хатти-ҳаракатлари икки давлат ўртасидаги келишувни бузгани ва икки томонлама муносабатларга ҳам, Шимолий Македониянинг Европа Иттифоқига қўшилиш истиқболларига ҳам хавф туғдираётгани ҳақида баёнот берди.
Греция шимолдаги қўшни давлат Македония номини қўллашига кескин қарши, чунки Греция бу юнон меросининг бир қисми экани ва қадимги Юнонистон Македония қироллигига ишора қилишини таъкидлаган.
Томонлар ўртасидаги қарама-қаршилик 10 йил давом этган, аммо 2018 йилда улар келишувга эришган ва мамлакат янги конституциявий Шимолий Македония номини олган. Шундан сўнг Греция Шимолий Македониянинг НАТО ва Европа Иттифоқига аъзо бўлиш учун ариза беришига эътирозларини қайтариб олганди.
Изоҳ (0)