Россия ташқи ишлар вазири в.б. Сергей Лавров агар Ғарб давлатлари Украина инқирозини жанг майдонида ҳал қилмоқчи бўлса, Москва бунга тайёрлигини маълум қилди, дея “РИА Новости” хабар берди.
Бу уларнинг ҳуқуқи, агар улар кураш жанг майдонида бўлишини хоҳласа, жанг майдонида бўлади, — деди россиялик дипломат.
Лавровнинг таъкидлашича, Украина бўйича Швейцарияда июнь ойида бўлиб ўтадиган ва Россия таклиф қилинмаган конференция фақат Москвага ультиматум қўйиш билан якунланади.
Шу билан бирга, у конференцияни “мактаб ўқувчисига танбеҳ” билан таққослаган.
Биласизми, ўқитувчилар кенгаши ёмон ўқувчини овозга қўйишади, ҳамма нарсани ўзаро ҳал қилишади, кейин ўқувчини чақириб, ҳукмни эълон қилишади. Бу тарзда ҳеч ким билан гаплашиб бўлмайди, айниқса, биз билан, — дея қўшимча қилган Лавров.
Кремль Киев расмийлари билан музокараларни ҳеч қачон рад этмаганини бир неча бор таъкидлаган. Путин Россия мулоқотга тайёрлигини, лекин у ҳақиқатга асосланиши кераклигини айтган.
Бундан ташқари, давлат раҳбари агар Украина музокараларни бошламоқчи бўлса, унинг раҳбарияти уларни тақиқловчи фармонни бекор қилиши кераклигига ишора қилган.
Изоҳ (0)