Исландия парламенти Украинани 2024—2028 йилларга мўлжалланган узоқ муддатли қўллаб-қувватлаш бўйича резолюция қабул қилди. Бу ҳақда Исландия ҳукумати матбуот хизмати хабар берди.
Исландия ташқи ишлар вазири Тоурдис Гильфадоуттир бу қарорни олқишлаб, Украинани кучли қўллаб-қувватлаш Исландия ҳамда Европа олдида турган энг муҳим хавфсизлик масаласи эканини таъкидлаган.
Хавфсизлигимиз ва турмуш даражамиз асос қилиб олинган халқаро ҳуқуқ тизими Россиянинг Украинага шафқатсиз бостириб кириши туфайли таҳдид остида. Шунинг учун биз Украина мудофаасига қатъий ва аниқ ҳисса қўшишимиз керак, — деган исландиялик вазир.
Унинг сўзларига кўра, мамлакат бюджетидаги ушбу резолюция асосида “Украинани мақсадли қўллаб-қувватлаш учун мустаҳкам пойдевор яратилган.
Киевга узоқ муддатли ёрдам Украинада мустақиллик, суверенитет, чегаралар, фуқаролар хавфсизлиги, гуманитар ёрдам ва қайта қуриш ишларини қўллаб-қувватлашга қаратилган бўлади, — дейилади пресс-релизда.
Украина президенти Владимир Зеленский Исландия ҳукуматига кўрсатган ёрдами учун миннатдорлик билдирган.
Исландия Украинанинг ишончли дўсти, ҳамкори ва иттифоқчисидир. Биз Исландиянинг Россияга қарши курашда кўрсатган қудратли ва кенг қамровли сиёсий ҳамда молиявий ёрдамини юксак қадрлаймиз, — деб ёзган Зеленский Х ижтимоий тармоғида.
Март ойи охирида Исландия ҳукумати Чехия ташаббуси доирасида Украинага ўқ-дорилар харид қилиш учун 2 миллион еврога яқин маблағ ажратишини маълум қилган эди.
Изоҳ (0)