АҚШ Сенати Украина, Исроил ва Тайванга 95 миллиард доллар миқдорида ҳарбий ёрдам кўрсатиш ҳақидаги қарорни маъқуллади. Бу ҳақда BBC хабар берди.
Қонун лойиҳасига кўра, Исроил учун 26 миллиард доллар, Украина учун 60,84 миллиард доллар, шунингдек, “коммунистик Хитойга қарши туриш” учун 8,12 миллиард доллар, жумладан, Тайванни қўллаб-қувватлаш учун тахминан 2 миллиард доллар ажратилади.
Эндиликда мазкур қарор кучга кириши учун президент Жо Байден томонидан имзоланиши керак. Байден Сенатдаги овоз беришдан сўнг дарҳол ҳужжатларни имзолашга ваъда берган, шундан сўнг Украинага ҳарбий ёрдамнинг биринчи партияси бир неча кун ичида етказилади.
Пакет тўртта қонун лойиҳасини ўз ичига олади: Украина, Исроил ва Тайванга ёрдам ва тўртинчи таклиф TikTok’ни потенциал тақиқлаш ва REPO қонуни. Охирги қонун Россиянинг мусодара қилинган активларини сотишга рухсат беради.
АҚШ Исроилга ва Ғазо секторига гуманитар ёрдам кўрсатиш учун 26 миллиард доллар, Тайван ва Ҳинд-Тинч океани минтақасида хавфсизликни таъминлаш учун 8 миллиард доллар ажратмоқда.
Украина президенти Владимир Зеленский америкалик сенаторларга қарори учун миннатдорлик билдирган.
“Мазкур овоз бериш жараёни Американинг демократия майоғи ва эркин дунё етакчиси сифатидаги ролини мустаҳкамлайди. Шунингдек, мен президент Байденнинг қўллаб-қувватлашини қадрлайман ва қонун лойиҳасининг тезда имзоланишини, навбатдаги ҳарбий ёрдам пакетининг етказилишини интиқлик билан кутаман. Украинанинг узоқ масофали қуроллари, артиллерия, ҳаво ҳужумидан мудофаа тизими адолат ва тинчликни тезда тиклаш учун жуда муҳим воситадир”, — деган Зеленский.
Изоҳ (0)