Оқ уй Миллий хавфсизлик кенгашининг стратегик коммуникациялар бўйича координатори Жон Кирби Вакиллар палатасини Украина ва Исроилга ёрдам кўрсатиш бўйича янги қонун лойиҳасини ишлаб чиқишдан воз кечишга чақирди.
Унинг таъкидлашича, иттифоқчиларни қўллаб-қувватлашнинг ягона йўли Сенат томонидан маъқулланган қонун лойиҳасини қабул қилишдир.
Матбуот анжуманида журналистлар Жон Кирбидан Эроннинг Исроил ҳудудларига қилган ҳужумларидан сўнг Оқ уйнинг Украина ва Исроилга ёрдам кўрсатиш бўйича позицияси ўзгарганми, деб сўради.
“Иттифоқчиларимиз ва ҳамкорларимизни қўллаб-қувватлашнинг энг яхши ва тезкор усули бу — Вакиллар палатаси айнан Сенатда қабул қилинган икки партиявий ёрдам тўғрисидаги қонун лойиҳасини қабул қилишидир”, — деб жавоб берди Кирби.
Унинг эслатишича, АҚШ президенти Жо Байден яқинда Вакиллар палатаси спикери Майк Жонсон ва бошқа Конгресс раҳбарлари билан учрашиб, уларга ушбу фикрни етказган.
2023 йил октябрь ойидан бери АҚШ Конгрессида Украинага маблағ ажратиш тўғрисидаги қонун лойиҳаси муҳокама қилинмоқда. 13 февраль куни Сенат Украина, Исроил ва Тайванга 95 миллиард доллардан ортиқ ёрдам ажратиш тўғрисидаги қонун лойиҳасини қўллаб-қувватлади (шундан 60 миллиард доллардан ортиғи Киевга ажратилади).
Бироқ республикачилар ёрдамни ажратиш алоҳида қонун лойиҳалари билан тартибга солиниши кераклигини таъкидламоқда. Бугун, 16 апрель куни Майк Жонсон шу ҳафтада алоҳида қонун лойиҳаларини овозга қўйишни режалаштираётганини маълум қилди.
Изоҳ (0)