Грузия депутатлари хорижий агентлар тўғрисидаги шов-шувли қонун лойиҳасини кўриб чиқиш чоғида муштлашди. Бу ҳақда “Ведомости” хабар берди.
Мухолифатдаги “Фуқаролар” партияси етакчиси Алеко Элисашвили минбарда чиқиши чоғида ҳукмрон “Грузия орзуси” партияси ижрочи котиби Мамука Мдинарадзега мушт туширган. Кейин бошқа депутатлар ҳам жанжалга қўшилган ва парламент сайти жонли эфирни тўхтатган.
3 апрель куни ҳукмрон “Грузия орзуси” партияси парламентга хорижий агентлар ҳақидаги қонун лойиҳасини киритди. Мдинарадзенинг сўзларига кўра, қонун лойиҳаси матни деярли ўтган йилгидек бўлади. Ягона фарқ “хориж таъсиридаги агент” атамасини “хорижий давлат манфаатларини илгари сурувчи ташкилот”га ўзгартириш бўлади.
Шов-шувли қонун
5 апрель куни Грузия мухолифати “Россия таъсирини камайтириш”га қаратилган хорижий агентлар тўғрисидаги муқобил қонун лойиҳасини рўйхатга олди. Қонун лойиҳасида “Грузия учун” партияси депутатларининг фикрича, Грузия конституциясида белгиланган ташқи сиёсат мақсадларини Россия манфаатлари йўлида ўзгартиришга ҳаракат қилаётган юридик ва жисмоний шахсларга нисбатан жиноий жавобгарлик белгилаш таклиф этилади. Шунингдек, бошқа давлатларнинг таъсирини назорат қилиш ҳам ўрин олган.
Лойиҳани қабул қилишга уриниш Тбилисида норозилик намойишлари бошлангани сабабли муваффақиятсизликка учради. Норозилик намойишлари 2023 йил март ойи бошида қонун лойиҳаси биринчи ўқишда қабул қилинганидан кейин бошланган. Ҳужжатда нодавлат нотижорат ташкилотлари ва оммавий ахборот воситалари даромадларининг 20 фоиздан ортиғи хориждан келадиган бўлса, уларга “хориж таъсиридаги агент” мақомини бериш кўзда тутилган.
2023 йил 10 март куни Грузия парламенти “Хорижий таъсирнинг шаффофлиги тўғрисида”ги қонун лойиҳасини иккинчи ўқишда рад этди. Шу куни Тбилисида норозилик намойиши якунланганди. Бироқ у 29 апрелдан қайта бошланди. Тбилисида мухолифат ва фуқаролик фаоллари қонун лойиҳасига қарши митинглар ўтказмоқда.
Изоҳ (0)