Инсон танасидаги сув миқдори 45-75 фоизни ташкил этади, шунинг сабаб етарли миқдорда сув ичиш организм учун муҳимдир, аммо кўпчилик танадаги сув балансини мувозанатда ушламайди. Тоза сув танадаги суюқлик етишмаслигини тўлдиради, касалликни енгишда ёрдам беради. Қаҳва, газли сув, шакарли шарбат каби баъзи ширин ичимликлар эса, аксинча, зарарли бўлиши мумкин.
Қўшимчаларсиз газли сувнинг фойда ва зарари
Газланган ва ширин қўшимчаларсиз сув чанқоқни яхши қондиради, тетиклантиради ва оддий сувга қараганда мазалироқ. Газли сув таркибида карбонат ангидрид мавжуд бўлиб, унинг нормадаги кўрсаткичи ичимликларда фарқ қилади. Давлат стандартларига кўра 1 литр сувда газ миқдори ўн граммдан ошмаслиги, яъни газ миқдори сув ҳажмининг бир фоизини ташкил қилиши лозим.
Баъзи табиий булоқлар табиий газланган минерал сувдан иборат, унинг фойдаси қадимдан эътироф этилган. Табиий газ билан тўйинмаган минерал сувнинг фойдали хусусиятларини сақлаб қолиш учун ишлаб чиқарувчилар унга газ қўшади, чунки карбонат ангидрид энг хавфсиз консервантлардан бири ҳисобланади.
Минерал сувнинг бир қанча фойдали хусусиятлари бор, жумладан, у меъда шираси кам ишлаб чиқилишини даволайди, ошқозон ва ичак деворларини мустаҳкамлайди. Шунингдек, минерал сувлардан тайёрланган доривор ўтлар дамлама таъсирини оширади, чунки табиий карбонат ангидрид сувни антибактериал препаратга айлантиради ва организмни патоген бактериялардан ҳимоя қилади.
Сувга сунъий равишда қўшилган карбонат ангидрид зарарли бўлиши мумкин. Биринчидан, газли сув ошқозон ва ичак касалликлари билан оғриганлар учун мумкин эмас, чунки карбонат ангидрид ички органлар шиллиқ қаватини яллиғлайди. Газланган сувни кўп истеъмол қилиш гастритга ҳам олиб келиши мумкин. Иккинчидан, карбонат ангидрид тиш эмалини емиради. Фақат бунинг учун газланган сувни ҳар куни кўп миқдорда ичиш керак.
Шакарли ва турли қўшимчалари бор газланган сувнинг фойда ва зарари
Шакар, шакар ўрнини босувчи моддалар, консервантлар, хушбўйлантирувчи кабилар қўшилган газланган сувнинг ҳеч қандай яхши жиҳати йўқ.
Газли ичимликларни баъзан, масалан байрамларда ичиб туриш зарар эмас, бироқ ҳаётини усиз тасаввур эта олмайдиган шахслар соғлиғи жиддий хавф остида бўлиши мумкин. Чунки газли ширин ичимликлар ортиқча вазнга, қонда глюкоза миқдори ортишига ва натижада қанд касаллигига олиб келиши мумкин.
Газланган ширин сувдаги ортофосфор кислотаси жуда зарарли, у суяклардаги калсийни камайтириб юборади ва тишлар эмалини емиради. Ишлаб чиқарувчилар фосфор кислотаси ўрнига лимон ёки олма кислоталаридан фойдаланиши мумкин, аммо уларнинг катта миқдори ҳам хатарли. Газли ичимликлардаги турли ранг берувчилар, консервантлар ва ароматизаторлар ҳам зарарлидир.
Изоҳ (0)