Айтишларича, машҳур модель Айшвария Рай “Ҳиндистон гўзали” гўзаллик танловига ариза топширганида, 20 нафар қиз шу заҳотиёқ бундай соҳибжамол бор жойда уларга ҳеч қандай имконият қолмаслигини билиб, танловда иштирок этишдан бош тортган. Бугунги кунда Айшвария нафақат ҳинд, балки Ғарб киноси юлдузи, шунингдек, танлов тарихидаги “Энг муваффақиятли дунё гўзали” унвонига ҳам эга.
Рай шоу-бизнесга киришини тасаввур қилиш қийин эди, чунки унинг оиласи Болливуд оламидан жуда узоқда бўлган.
Айшвария Рай 1973 йил 1 ноябрда Ҳиндистон армияси биологи Кришнараж Рай ва уй бекаси Вринда оиласида туғилган. Ҳинд меъёрлари бўйича бу оила кичик ҳисобланган — иккита бола: ўғли Адитя, у ҳозирда денгиз флотида офицер бўлиб ишлайди ва қизи Айшвария.
Рай сулоласининг илдизлари Жанубий Ҳиндистонга, Карнатака штатининг Мангалор шаҳрига бориб тақалади. Айшвария болалигидан уч тилда гапира олган: у инглиз, ҳинд ва она тили тулу тилларини яхши билади. Туғилишидан кўп ўтмай, 1970 йилларнинг ўрталарида ўша пайтда савдо денгиз флоти офицери бўлган отасининг иши Мумбайга кўчирилади.
Дўстлари ва қариндошларининг сўзларига кўра, Айш ҳар доим аълочи бўлган ва рақсга тушишни яхши кўрарди. Актриса ўзининг дастлабки интервьюларида шундай дейди:
Мен синфда ҳар доим биринчи бўлганман. Фақат бир марта, 7-синфда ўқиётганимда имтиҳонларда учинчи бўлганман. Бу менга қанчалик зарба берганини эслайман. Энг зўри бўлиш ва бошқаларни мағлуб этиш мен учун қанчалик муҳимлигини ўшанда англагандим. Шундан кейин кунлаб ухламаганман, тун бўйи топшириқларни ўрганиб, охирги семестрда яна барча фанлардан биринчи бўлганман.
Айтишларича, унинг гўзаллиги ҳақидаги гап-сўзлар ҳар ёнга тарқалади. Кейинчалик Айшвариянинг синфдошлари ва ўқитувчилари кўк кўзли соҳибжамол қизни кўриш учун коллеж дарвозаси олдида турнақатор навбатлар пайдо бўлганини эслашади.
Коллежда ўқитувчиси ёш Айшварияга портфолио қилишни маслаҳат беради. Бу ижтимоий тармоқлардан анча олдинги гап эди, лекин унинг суратлари интернетда тезда тарқалиб кетади. Фотосуратчилар Гаутам Ражадҳякша ва Фаррох Чотиа уни ўқувчи қиздан юзлаб маҳсулотларни реклама қиладиган моделга айлантиради.
Сари, туш, соат ёки совун бўладими, Райнинг юзи бутун Ҳиндистондаги плакатларни безайди. 1993 йилда эса Болливуд актёри Амир Хон иштирокидаги Pepsi реклама ролиги чиқади ва қизнинг карьерасини ўзгартириб юборади.
Мумбайдаги машҳурлик давом этаётган бир вақтда, Айшвария жанубга саёҳат қилади ва у ерда малаялам ва тулу тилларидаги рекламаларда суратга тушади. Айшвариянинг дўстлари унга “Ҳиндистон гўзали” танловида қатнашишни маслаҳат беришади. Аввалига у буни истамайди, лекин охир-оқибат рози бўлади. Мазкур танловда ғолиб бўлишдан ёки фильмларда роль ўйнашдан анча олдин “дунёдаги энг гўзал қиз” номини олиб бўлган Айшвариянинг иштирок этаётганини билган 20 нафар қиз танловда иштирок этишдан бош тортади.
Рай чиндан ҳам мусобақада пешқадамлик қилади, аммо сўнгги турда “Коинот гўзали” унвонини қўлга киритган Сушмита Сенга ютқазади.
Айшвария иккинчи ўринни эгаллайди, лекин у дарҳол “Дунё гўзали” танловига ҳужжат топширади ва максимал балл билан тожни қўлга киритади. 20 йилдан сўнг эса ташкилотчиларнинг фикри асосида шакллантирилган танлов тарихидаги “Энг муваффақиятли дунё гўзали” унвонига сазовор бўлади.
Ғалаба қозониб, Ҳиндистонга қайтгандан сўнг қиз учун кейинги қадам Болливуд бўлади. Аммо бунинг ўрнига Айшвария тамил кино саноатини танлайди ва 1997 йилда танқидчилар томонидан эътироф этилган “Дуэт” фильмида Мани Ратнам билан дебют қилади. Истеъдодли актриса тез орада Болливуд, ўн йилдан кейин эса Голливуд экранларида пайдо бўлади.
Болливуддаги дебютидан роппа-роса ўн йил ўтгач, 2007 йил апрель ойида у ҳамкасби Абхишек Баччан — ҳинд киноси юлдузлари Жая ва Амитабҳ Баччаннинг ўғлига турмушга чиқади.
Она бўлганидан сўнг Айш катта экранда камроқ кўрина бошлайди. У охирги марта Мани Ратнамнинг “Каверининг ўғли” лойиҳасида суратга тушган. Икки қисмли эпик драма танқидчилар томонидан жуда кўп ижобий баҳоларга сазовор бўлади ва тамил киноси тарихидаги энг юқори даромад келтирувчи фильмлардан бирига айланади.
Изоҳ (0)