Исроил ташқи ишлар вазири Исраэл Кас Европа Иттифоқини Эронга нисбатан санкция қўллашга чақирди. Бу ҳақда Al Jazeera нашри хабар берди.
Хабарга кўра, Исроил расмийси, шунингдек, Теҳронга бўйсунувчи Ислом инқилоби қўриқчилари корпусини ҳам “террорчи ташкилот” деб эълон қилишга чақирган. Бу ташкилот Яқин Шарқда инсон ҳуқуқлари бузилиши билан боғлиқ бир қанча жиноятлар содир этганини маълум қилган.
“Оятуллоҳ Али Хоманаий режими ҲАМАС жиноятларини қўллаб-қувватловчи жиноий режим ва ҳозирда халқаро ҳуқуқни бузган ҳолда қароқчилик операцияларини амалга оширмоқда”, — деган Исраэл Кас.
“Мен Европа Иттифоқи ва эркин дунёни Эрон инқилобий қўриқчилар корпусини террорчи ташкилот деб эълон қилишга ва ҳозирданоқ Эронга санкциялар киритишга чақираман”, — дея қўшимча қилган Тель-Авив расмийси.
Олдинроқ Эрон олий раҳбариятига бўйсунувчи Ислом инқилоби қўриқчилари корпуси томонидан Ҳўрмуз бўғозида йирик юк ташувчи кема қўлга олингани хабар қилинган эди. Исроиллик молия магнати Эял Офер бошқарувидаги Zodiac Maritime юк ташиш компаниясига тегишли бўлган кема Португалия байроғи остида сузиб кетаётганида аниқланган.
Изоҳ (0)