Исроил яқин 24-48 соат ичида Эроннинг ҳужумини қайтаришга тайёрланмоқда. Бу ҳақда The Wall Street Journal хабар берди.
Нашр Эрон раҳбариятига яқин манбаларга таяниб, ҳужум мамлакат жанубида ёки шимолида амалга оширилишини маълум қилди. Аммо операция режаси муҳокама қилинаётгани учун “ҳали якуний қарор қабул қилинмаган”.
Бир қатор Америка оммавий ахборот воситалари Эрон “ракеталар ва дронлардан фойдаланган ҳолда кенг миқёсли ҳаво ҳужумини” режалаштираётганини ёзмоқда. Шу билан бирга, бу ҳужумлар чекланган бўлиши мумкин, чунки Теҳрон Вашингтонни жавоб ҳаракатларига қўзғатмоқчи эмас.
Айни пайтда АҚШ давлат котиби Энтони Блинкен Хитой, Туркия ва Саудия Арабистони ташқи ишлар вазирларидан вазиятни кескинлаштирмаслик учун Эронга босим ўтказишни сўраган.
“Яқин Шарқдаги вазият авж олиш хавфидан, хусусан, сўнгги кунларда Эрон томонидан Исроил давлати ва халқига нисбатан қилинган таҳдидлардан хавотирдамиз. Президент (Байден) Исроилнинг бу таҳдидларга қарши курашда хавфсизлигини қатъий қўллаб-қувватлашини очиқ айтди... Бу конфликтнинг янада кучайиши нафақат Исроил, Эрон, минтақа давлатларига, балки бутун дунёга зарар етказади”, — деди АҚШ Давлат департаменти матбуот котиби Метю Миллер.
АҚШ Марказий разведка бошқармаси Исроил расмийларини “яқинда содир бўладиган оммавий ҳужум” ҳақида огоҳлантирган. Америка расмийларининг таъкидлашича, Эрон камида учта ядровий бомба ишлаб чиқариш учун етарли даражада бойитилган уранга эга. Бу ҳақда расмий маълумот йўқ, аммо Эроннинг баллистик ракеталари Исроилга зарба бера олади.
Эрон ва Исроил ўртасидаги уруш эҳтимоли
Кенг кўламли уруш бошланиши эҳтимоли Исроил 1 апрель куни Эроннинг Дамашқдаги консуллигига ҳужум қилганидан сўнг бошланди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлди. Шунингдек, уч нафар Сурия ва бир нафари Ливан фуқароси вафот этди.
Эроннинг БМТ миссияси зарбани теракт деб баҳолади. Эрон ташқи ишлар вазири Ҳусайн Амир Абдуллаҳиён мазкур ҳужум муносабати билан Америка жавобгарликка тортилиши кераклигини айтди. Шундан кейин АҚШ разведкаси Исроилни Эроннинг жавоб зарбаларидан огоҳлантирди. Бунинг фонида Исроил бир қатор давлатлардаги элчихоналарини вақтинчалик ёпди ва ходимларга ишга келмаслик сўралди.
Исроил бош вазири Биньямин Нетаньяху Эроннинг зарба бериш таҳдидига жавобан, улар ҳар қандай сценарийга тайёрликларини айтди.
Эрон йиллар давомида бизга қарши бевосита ва ўз эмиссарлари орқали ишлади, шунинг учун ҳам Исроил Эрон ҳамда унинг эмиссарларига қарши мудофаа ва ҳужумда фаолият юритди. Ўзимизни қандай ҳимоя қилишни биламиз. Биз оддий тамойил асосида иш тутамиз – бизга зарар етказган ёки шундай қилишни режалаштирган ҳар кимга зарар етказамиз, — деди Нетаньяху.
Изоҳ (0)