Франция ва Буюк Британия Россия Украинага қарши урушда ғалаба қозонмаслиги кераклигини таъкидлади.
Украина бу урушда ғалаба қозониши керак. Агар Украина мағлуб бўлса, биз ҳаммамиз ютқазамиз. Ҳозир Украинани қўллаб-қувватламасликнинг нархи Путинни қайтаришдан анча қимматроқ бўлади, — деб ёзади Британия ва Франция ташқи ишлар вазирлари Девид Кемерон ва Стефан Сежурне The Telegraph нашрида.
Вазирлар ўз мамлакатлари томонидан Украинага кўрсатилаётган ёрдамдан ғурурланишларини, аммо Россияни мағлуб этиш учун кўпроқ ёрдам бериш кераклигини айтган. Россия раҳбарияти Россияни жанг майдонида мағлуб этиб бўлмаслигини бир неча бор таъкидлаган.
Кемерон ва Сежурне июль ойида Германияда бўлиб ўтадиган Европа сиёсий ҳамжамиятининг саммитида Украинани қўллаб-қувватлашни яна бир бор тасдиқлашга, шунингдек, июль ойида Қўшма Штатларда НАТО саммити самарали ўтказилишини таъминлашга ваъда берган.
Bloomberg аввалроқ Украинанинг ғарбий ҳамкорлари келаётган ёзда Россиянинг кенг кўламли ҳужумидан хавотирда эканлигини айтган эди. Уларнинг ҳисоб-китобларига кўра, Россия қўшинлари ҳозирда Украина армиясига қараганда сезиларли даражада кўпроқ снарядлардан фойдаланмоқда.
Украина президенти Владимир Зеленский ҳам Киевда ҳужум қилиш учун етарлича ўқ-дорилар йўқлигини тан олган.
Киев 2022 йилнинг кузида НАТОга аъзо бўлиш учун ариза берган. Иттифоқчилар Украинанинг альянсга қўшилиш истиқболи борасида келиша олмаган. Болтиқбўйи мамлакатлари ва Польша мазкур қарорни қўллаб-қувватлаган. АҚШ ва Германия Украинанинг НАТОга кириш вақти ҳали келмаган деб ҳисоблаган эди.
Июль ойида АҚШда бўлиб ўтадиган альянс саммитида Украина альянсга аъзо бўлишга таклиф қилинмайди, — деб маълум қилган Тhе New York Times.
Изоҳ (0)