Россия Тергов қўмитаси Crocus City Hall’га ҳужум қилган террорчилар ва Украина хавфсизлик хизматлари ўртасида алоқа борлигини аниқлади. Бу ҳақда “ТАСС” нашри маълум қилди.
“Ҳозирги вақтда жиноят иши бўйича ушбу ўта оғир жиноятни содир этишда иштирок этган 11 нафар шахс аниқланган. Уларнинг барчасига нисбатан айблов эълон қилиниб, қамоққа олиш тарзидаги эҳтиёт чораси қўлланган. Тергов қўмитаси томонидан салмоқли далиллар тўпланган. Террорчиларнинг Украина махсус хизматлари билан алоқаси борлигини кўрсатувчи далиллар бор. Далиллар жиноятга узоқ тайёргарлик кўрилганини кўрсатади”, — дейилади расмий хабарда.
Ҳозирда жабрланганлар ва гувоҳлар билан ишлаш давом этаётгани хабар қилинган. Терактда ҳалок бўлганларнинг шахси аниқланмоқда. Жиноятнинг бошқа иштирокчилари — айбдорлар, ёрдамчилар ва ташкилотчиларни аниқлаш ва ҳибсга олишга қаратилган тергов ҳаракатлари ва жиноий разведка тадбирлари олиб борилмоқда.
Тергов қўмитаси воқеанинг тўлиқ тасвирини энг кичик деталларигача қайта тиклаётгани айтилган. Қўмита раҳбари жиноятни навбатдаги тергов қилиш бўйича бир қатор аниқ кўрсатмалар берган.
Россия Тергов қўмитаси терактга Украина хавфсизлик хизматлари алоқадорлигини кўрсатувчи далиллар топилганини расман маълум қилган бўлса-да, бу далиллар нимадан иборат эканлиги очиқланмаган.
Изоҳ (0)