Литва президенти Гитанас Науседа Ғарб давлатлари Украинага қўшин юбориш ғоясини муҳокама қилишлари кераклигини айтди. Бу ҳақда LRТ хабар берди.
“Мен Украинага миссиялар юбориш ғоясини мамнуният билан қабул қилдим ва ҳали ҳам буни муҳокама қилишимиз керак, деб ҳисоблайман. Албатта, барчамиз бир овоздан бунинг зарурлигига рози бўлиб, бизда мавжуд разведка ва бошқа маълумотларни баҳоласак яхши бўларди”, — дейди у.
Науседанинг қўшимча қилишича, бу қарорда ҳал қилувчи омил Москванинг эҳтимолий реакциясидан қўрқиш бўлиши мумкин эмас.
“Шунинг учун кеча президент Макронга ҳам, оммавий ахборот воситаларига ҳам ўзимиз учун қизил чизиқлар чизишни тўхтатишимиз кераклигини айтдим. Ахир бу билан Ғарб Россия президенти Владимир Путинга ёрдам бермоқда, у европаликларни осонликча манипуляция қилиши мумкин деб ўйлай бошлайди”, — деди Литва президенти.
26 февраль куни Макрон Европа давлатлари раҳбарлари билан учрашувдан сўнг Украинага қўшин киритилиши эҳтимолини рад этмади. У бу Киевни қўллаб-қувватлаш вариантларидан бири эканини таъкидлаган. Макроннинг ташаббуси Буюк Британия, Венгрия, Италия, Словакия, Чехия ва Швеция томонидан қўллаб-қувватланмаган.
Кремль бу ҳолатда “биз Россия ва НАТО ўртасидаги тўғридан тўғри тўқнашув эҳтимоли ҳақида эмас, балки муқаррарлиги ҳақида гапиришимиз керак” дея муносабат билдирди. НАТО бош котиби Йенс Столтенберг альянс Украинага ўз қўшинларини юборишни режалаштирмаётганини айтди.
Изоҳ (0)