Бухорода корхона раҳбари банк собиқ масъуллари билан тил бириктириб 1,3 млрд сўм кредит пулларни ўзлаштирди

Бухоро шаҳрида 1,3 миллиард сўм кредит маблағини ўзлаштирган корхона раҳбари аниқланди, деб хабар бермоқда Бош прокуратура ҳузуридаги департамент.

Департаментнинг Бухоро шаҳар бўлими томонидан ўтказилган терговга қадар текширувда, «Т.Н.» оилавий корхонаси раҳбари Ф.Г. ҳудудий тижорат банки филиалининг собиқ масъул шахслари билан ўзаро тил бириктириб, корхонага 2019 йилда ажратилган кредит таъминоти учун гаровга қўйилган меҳмонхона биносини қайта гаровга қўйиб, сунъий равишда қиммат нархда баҳолатгани аниқланган.

Бундан ташқари, қўшимча бино қуриш учун яна 900 миллион сўм кредит ажратилишига эришиб, банк филиалининг жами 1,3 миллиард сўм кредит маблағини ўзлаштириш ва растрата қилиш йўли билан талон-торож қилган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари олиб борилмоқда.

Мавзуга доир: Ўзини банк ходими деб таништириб, фарғоналик фуқарони 12,4 млн сўмга чув туширган шахс ушланди