Кўпчилик Cobalt автомобили датчиги ҳаво ҳароратини 80 даражагача кўрсаца, ишониб ваҳимага тушади. Аслида, қурилма ҳарорат 40 даражадан орца, “алдашни” бошлайди. Бу ҳақда иқлимшунос Эркин Абдулаҳатов YouTube’даги суҳбатда тушунтириш берди.
Эркин Абдулаҳатовнинг айтишича, Cobalt ҳаво ҳароратини ўта юқори даражада кўрсатиши аҳолини жуда кўп ташвишлантиради. Лекин датчик Ўзбекистон иқлимига мослаштирилмаган. Шу боис қурилма кўрсатган ҳароратга ишонавермаслик керак.
Ҳаво ҳарорати 50, 60, 70, ҳатто 80 даражагача исиди, деган гапларни тўхтатишимиз керак. Ўзи, менимча, ҳароратни фақат Cobalt кўрсатади. Масалан, Gentra кўрсатмайди. Cobalt фараси олдида жойлашган датчик ғарб, шарқ мамлакатлари, Хитой ёки Корея учун ишлаб чиқилган. У давлатларда ҳаво ҳарорати 40 даражадан юқори бўлмайди. Шу сабаб датчиклар асосан 40 даражагача ҳароратни ўлчашга мослаштирилган. Автомобиль йўриқномасини кўрсангиз, датчик 40 даражадан кейин “ўйнаб кетиши” ҳақида ёзилган.
Оддий мисол, Урганчда 2020 йилда ишлаб чиқарилган оқ ва қора Cobalt автомобилларида эксперимент ўтказилган. Машиналар бир жойга ёнма-ён қўйилган. Шаҳарда ҳаво ҳарорати 41 даража иссиқ бўлган. Ўша пайтда оқ Cobalt ҳароратни 48 даража, қораси эса 56 даража иссиқ кўрсатган. Бир жойдаги машиналар ҳарорат ҳақида турлича маълумот берган, деди иқлимшунос.
Аввалроқ Эркин Абдулаҳатов Telegram каналида сўров ўтказганди. Савол сўнгги кунларда кузатилган иссиқ об-ҳаво кузатувчилар уйқусига қандай таъсир қилгани ҳақида бўлган. 70 фоиздан ортиқ обуначи жазирама иссиқ уйқуга салбий таъсир қилаётганини билдирган.
Иқлимшунос Ўзбекистонда янгича иқлимий давр бошланаётганини ҳам таъкидлаган. Аҳоли келажакда бундай жазирама кунларга тез-тез тўқнашишини ёзган. Бунинг учун организмни янгича ташқи муҳитга аста-секин мослаштириб бориш муҳимлигини қайд этган.
Изоҳ (0)