“Вест Ҳэм” клуби ярим ҳимоячиси Лукас Пакетага нисбатан қўйилган гаров тикиш билан боғлиқ барча айбловлар бекор қилинди. Шундан сўнг Англиянинг бошқа бир клуби — “Манчестер Сити” бразилиялик футболчига яна қизиқиш билдира бошлади. Бу ҳақда TBR Football нашри хабар берди. Манбага кўра, “шаҳарликлар” 27 ёшли Пакетани 2023 йилда сотиб олиши мумкин эди. Ўша вақтда томонлар футболчининг трансфери бўйича келишувга эришган ва “Манчестер Сити” уни 80 миллион фунт (91,2 миллион евро) эвазига харид қилишга тайёрлигини билдирган. Бироқ футболчига қарши олиб борилган тергов ишлари сабабли трансфер амалга ошмаган. Эндиликда футболчининг номи оқлангач, трансфер масаласи яна кун тартибига қайтди. Айни пайтда Пакетага бўлган таклиф нархи аввалгисига қараганда сезиларли даражада камайиши мумкин. Эслатиб ўтамиз, Пакета 2022/23 ҳамда 2023/24 йилги мавсумларда “Лестер”, “Астон Вилла”, “Лидс Юнайтед” ва “Борнмут” жамоаларига қарши ўйинларда атайлаб сариқ карточка олганликда гумон қилинган. Бу ҳолат унга нисбатан умрбод дисквалификация эҳтимолини юзага келтирган эди. Бироқ якунда бу айбловлар ўз тасдиғини топмади. Маълумот учун, ўтган мавсумда Пакета барча мусобақаларда 36 та ўйинда майдонга тушиб, 5 та гол муаллифи бўлган. Унинг “Вест Ҳэм” билан тузган шартномаси 2027 йилгача амал қилади. Transfermarkt портали футболчининг ҳозирги трансфер қийматини 28 миллион еврога баҳоламоқда.
Изоҳ (0)