Аргентина президенти Хавьер Милей яқин келажакда 70 минг нафар давлат хизматчисини ишдан бўшатиш ниятида эканлигини маълум қилди.
Унинг айтишича, бу чора-тадбирлар мамлакат бюджетини ортиқча юкламадан халос қилиш мақсадида амалга оширилмоқда.
Хавьер Милейнинг сўзларига кўра, расмийлар аллақачон катта эҳтиёж бўлмаган 200 мингта ижтимоий дастурни бекор қилган.
“Биз 50 минг нафар давлат хизматчисини аллақачон ишдан бўшатганмиз, уларнинг шартномалари бекор қилинди. Эндиликда давлат идораларидаги яна 70 мингта штат қисқартирилади”, — деб ваъда берди Аргентина президенти.
2023 йил декабрида лавозимга киришган Хавьер Милей Аргентинадаги вазиятни ўта оғир деб баҳолади. У иқтисодиётда кескин чоралар зарурлигини эълон қилди ва мамлакатда норозиликларга сабаб бўлган ислоҳотлар пакетини тақдим этди.
Хавьер Милей иқтисодни либераллаштиришга қаратилган 300 дан ортиқ ислоҳот тўғрисидаги фавқулодда фармонни имзолади, бунда давлат харажатлари жиддий қисқартирилди.
Изоҳ (0)