Қашқадарё вилояти Китоб тумани “Аёқчи” қишлоғидаги асосий кўприкнинг бир қисмини 21 март куни ёққан ёмғир натижасида юзага келган сел ювиб кетганди. Туман ҳокимлиги матбуот хизматининг маълум қилишича, ҳозирда кўприкда транспорт воситалар ҳаракати қайта тикланган.
Китоб туманининг “Аёқчисой” дарёси устидан ўтувчи 4K-271 Русқишлоқ—Макрид—Минжир автомобиль йўлидаги узунлиги 47 метр бўлган кўприкка туташ йўлнинг бир қисмини сув ювиб кетган. Ҳодиса оқибатида ҳеч ким зарар кўрмаган. Воқеа жойига тезда туман фавқулодда вазиятлар бўлими ҳамда бир қатор ҳамкор ташкилотлардан иборат тезкор гуруҳ етиб борган.
“Кўрилган чоралар натижасида дарё ўзани махсус техникаларни жалб қилиш орқали бетон плиталар ёрдамида иҳоталаниб, йўлнинг сув ювиб кетган қисми қум-шағал ёрдамида қайта тўлдирилди. Ҳозирда кўприкда транспорт воситалар ҳаракати қайта тикланган. Тезкор гуруҳнинг кўприк таъмири ишлари якуний босқичга кирган”, — дейилади хабарда.
Аввалроқ Самарқандда ҳам сув тошқини зарар етказган кўприк қайта тиклангани маълум қилинганди.
Изоҳ (0)