Qashqadaryo viloyati Kitob tumani “Ayoqchi” qishlog‘idagi asosiy ko‘prikning bir qismini 21-mart kuni yog‘gan yomg‘ir natijasida yuzaga kelgan sel yuvib ketgandi. Tuman hokimligi matbuot xizmatining ma’lum qilishicha, hozirda ko‘prikda transport vositalar harakati qayta tiklangan.
Kitob tumanining “Ayoqchisoy” daryosi ustidan o‘tuvchi 4K-271 Rusqishloq—Makrid—Minjir avtomobil yo‘lidagi uzunligi 47 metr bo‘lgan ko‘prikka tutash yo‘lning bir qismini suv yuvib ketgan. Hodisa oqibatida hech kim zarar ko‘rmagan. Voqea joyiga tezda tuman favqulodda vaziyatlar bo‘limi hamda bir qator hamkor tashkilotlardan iborat tezkor guruh yetib borgan.
“Ko‘rilgan choralar natijasida daryo o‘zani maxsus texnikalarni jalb qilish orqali beton plitalar yordamida ihotalanib, yo‘lning suv yuvib ketgan qismi qum-shag‘al yordamida qayta to‘ldirildi. Hozirda ko‘prikda transport vositalar harakati qayta tiklangan. Tezkor guruhning ko‘prik taʼmiri ishlari yakuniy bosqichga kirgan”, — deyiladi xabarda.
Avvalroq Samarqandda ham suv toshqini zarar yetkazgan ko‘prik qayta tiklangani ma’lum qilingandi.
Izoh (0)