Сурхондарё вилоятининг Қумқўрғон туманида 21 март куни юз берган сел-сув тошқини оқибатида юздан ортиқ хонадонларга сув киргани ҳақида хабар берилган эди. Қуйида ушбу талафот вақтида ва ундан кейин воқеа жойидан олинган сурат ва видеолар жамланди.
Вилоят ҳокимлиги матбуот хизматининг маълум қилишича, 21 март куни тахминан соат 19:10 лар атрофида Қумқўрғон тумани ҳудудидаги қир-адирликларда кучли ёмғир ёғиши натижасида йиғилган ёмғир сувлари Арналисой орқали “Элобод” маҳалласига кириб келган.
Кўп миқдордаги ёмғир сувлари маҳалла ҳудудидаги ички сув тармоқларига сиғмасдан, ҳудуддаги 2 та ички кўчаларда жойлашган 47 та хонадоннинг ҳовли ва томорқаларига, айрим турар жойлар ичкарисига кирган. Кучли ёмғир сувлари Азларсойдан тошиб, сой қуйисида жойлашган “Азларсой” маҳалласи ҳудудидаги 5 та ички кўчаларда жойлашган 56 та хонадон ҳовли ва томорқаларига ҳам кирган.
Тошқин оқибатларини бартараф этиш ва аҳолининг хавфсизлигини таъминлаш мақсадида “Азларсой” маҳалласидаги 56 та хонадондан 210 нафар ва “Элобод” маҳалласидаги 32 та хонадондан 150 нафар аҳоли хавфсиз ҳудудда жойлашган яқин қариндошларининг уйларига вақтинча кўчирилган.
Туман ҳудудидан ўтувчи М-41 Олмаота—Бишкек—Душанбе—Термиз автомобиль йўлининг 1535–1536-километри оралиғида вақтинчалик ҳаракат чекланиб, сув тошқинлари тугаганидан сўнг, йўлга йиғилган лойқалар махсус техникалар ёрдамида тозаланиб, транспорт қатнови яна тикланган.
Ҳудуддан кесиб ўтувчи темирйўлнинг 400 метр қисмини сел сувлари ювиб ўтган.
Таъмирлаш ва тиклаш ишлари бажарилиб, 22 март куни соат 07:00 да темирйўл ҳаракати тўлиқ тикланган.
Қумқўрғон тумани ҳокимлигининг маълум қилишича, сел талафотидан жабр кўрган фуқаролар учун тезкор штаб ташкил этилди.
-pEcnuFpb.jpg)
-x0y_OAU_.jpg)
Туман ҳокимлиги, сектор раҳбарлари, вилоят ташкилотлари, туман ташкилотлари томонидан хонадони талафот кўрган фуқароларга барча ёрдамлар кўрсатиш учун бошқа туманлардан қўшимча куч ва воситалар ёрдамлари жалб этилган.
Тармоқларда тарқалган видеолардан сел-сув тошқинида сувнинг баландлиги қанчага етганини деворлардаги излардан кўриш мумкин.
Сурхондарё вилояти ҳокимлиги матбуот хизмати берган ахборотга кўра, юзага келган сув тошқинлари оқибатида жароҳат олганлар йўқ.
Ҳолат шахсан вилоят ҳокимининг назоратига олинган бўлиб, кечанинг ўзида ҳодиса жойига вилоят ҳокимининг ўринбосарлари, ФВВ вакили, ФВБ, ИИБ, МГБ бошлиқлари, туман ҳокимлиги, сектор раҳбарлари, корхона ва ташкилот мутасаддилари етиб боришган ҳамда тошқинга қарши вилоят тезкор штаби тузилган.
Ҳозирда тезкор штаб томонидан ҳодиса оқибатларини ўрганиш, етказилган талафотларни бартараф этиш, аҳолига кўмак бериш чоралари кўрилмоқда. Амалга оширилган ишлар юзасидан вилоят раҳбарига ахборот бериб борилмоқда.
Изоҳ (0)