Ўзбекистон Ташқи ишлар вазирлиги Москва шаҳридаги Crocus City Hall’да содир этилган терактни кескин қоралайди. Бу ҳақда вазирлик матбуот хизмати хабар берди.
“Терроризмни оқлаб бўлмайди, биз бегуноҳ фуқароларга нисбатан қилинган бундай зўравонликни бир овоздан рад этишга чақирамиз”, — дейилади ТИВ хабарида.
Вазирлик ҳалок бўлганларнинг оила аъзолари ва яқинларига ҳамдардлик билдирди. Шунингдек, Ўзбекистоннинг Москвадаги элчихонаси Crocus City Hall савдо марказида рўй берган портлаш ва отишма оқибатида кўплаб қурбонлар бўлгани юзасидан баёнот берди.
Элчихона тинч аҳоли вакиллари жабрлангани ҳақидаги хабарни чуқур қайғу билан қабул қилганини таъкидлаган. Қайд этилишича, элчихона ҳуқуқ-тартибот идоралари билан яқин алоқада бўлиб турибди, ҳозирда жабрланган Ўзбекистон фуқаролари ҳақида маълумот келиб тушмаган.
“Ўзбекистон фуқароларини хотиржамликка ва хавфсизлик чораларига риоя қилишга чақирамиз”, — дейилади баёнотда.
Фуқаролардан зарур ҳолларда Ўзбекистоннинг Москвадаги элчихонаси консуллик бўлимининг Call марказига (+7 499 238-36-20; +7−499 230−00−76) қўнғироқ қилиш сўралди.
22 март куни Москва вилоятидаги “Пикник” гуруҳининг концерти бўлиб ўтаётган Crocus City Hall концерт залида номаълум шахслар ўт очди. Бинода портлаш содир бўлган ва ёнғин бошланган. Қурбонлар сони 40 дан ошгани айтилмоқда.
Изоҳ (0)