Россия ҳукумати оккупация қилинган Украина шарқидаги маҳаллий украин ўсмирларини Россия ичкарисига кўчириб, улардан иборат армия тузишга интилмоқда. Бундан мақсад эса украинларни бир-бири билан уриштириш. Бу ҳақда CNN нашри хабар берди.
Хабарда айтилишича, Россия кучлари 2022 йилнинг баҳорида Украинанинг босиб олинган Мариупол шаҳри ва атроф ҳудудлардан кўплаб украин ўсмирларини Россия ичкарисига кўчирган. Ўсмирларнинг бир қисми Москвага етказилиб, ҳомийлик остидаги оилаларга берилган. Қолганлар Москва яқинидаги ватанпарварлик лагерига жойлаштирилган. Бу ерда украин болалари Россияга хайрихоҳ руҳда қайта тарбияланиши мақсад қилинган.
2023 йил давомида Россия ҳудудидаги лагерларда тайёргарликдан ўтган ўсмирларнинг кўпчилигига урушга чақирув қоғози келган. Улар мажбурий тарзда армияга сафарбар қилинган.
Манбага кўра, бу ҳаракатлар руслар томонидан украинларни бир-бирлари билан уриштириш мақсадида амалга оширилган. Ўсмирлар орасида ҳарбий хизматдан бош тортиш ҳолатлари ҳам бўлиб, шундай қилганлар интизомий жазога тортилган.
Украина расмийларининг ҳисоб-китобларига кўра, 2022 йил февраль ойида Москва мамлакатга кенг кўламли босқин бошлаганидан бери 20 минг нафар бола Россияга мажбуран олиб кетилган. 2,1 мингдан ортиқ бола бедарак йўқолган. Бироқ ҳукуматнинг айтишича, ҳақиқий рақам бундан ҳам кўпроқ бўлиши мумкин.
Россия томони асирликка олинган украин ўсмирларидан “Мариупол” батальонини тузиб, Донбассда урушга киритгани хабар қилинган. Аммо бу хабар расман тасдиқланмаган.
Изоҳ (0)