Қозоғистон Американинг Apple компанияси билан музокаралар олиб бормоқда. Бу ҳақда Рақамли ривожланиш, инновациялар ва аэрокосмик саноат вазирлигига таяниб, Tengrinews хабар берди.
Вазирликка кўра, музокаралар Қозоғистонда Apple компаниясининг расмий офисини очиш билан боғлиқ. Қўшни республикада Apple офисини очиш масаласи шу йилнинг 23 январида Олмаотада содир бўлган зилзиладан кейин пайдо бўлди. Ўшанда iPhone фойдаланувчилари смартфонларига огоҳлантиришлар келмаган. Агар Apple Қозоғистонда ўз ваколатхонасини очса, бу Марказий Осиёда биринчиси бўлади.
2021 йилда Ўзбекистонда Apple ва Netflix ваколатхоналари очилиши ҳақидаги маълумотлар кенг муҳокама қилинган эди.
“Дунёдаги топ-10 ликка кирадиган Samsung компаниясининг республикамизда тўртта расмий офиси очилди. Яқин кунларда Apple компаниясининг ҳам расмий офислари очилиши режалаштирилмоқда”, — деган ўшанда Ахборот технологиялари ва коммуникацияларини ривожлантириш вазирлиги ахборот хизмати раҳбари Шерзод Аҳматов.
Бироқ ўшандан бери бу ҳақда ҳеч қандай маълумот бўлмаган.
Изоҳ (0)