Қозоғистон суперкомпьютер яратиш учун Американинг йирик компанияларини жалб қилиш устида ишламоқда. Бу ҳақда республика Рақамли ривожланиш, инновациялар ва аэрокосмик саноат вазирлигига таяниб, Tengrinews хабар берди.
Ҳозирда вазирлик маълумотларига кўра, компаниялар билан “дастлабки босқичда” музокаралар олиб борилмоқда.
“Вазирлик томонидан Қозоғистондаги маълумотларни қайта ишлаш марказлари ва суперкомпьютерлар лойиҳаларига Microsoft, Google, Amazon каби йирик компанияларни жалб этиш имкониятларини ўрганиш бўйича ишлар олиб борилмоқда. Хусусан, дастлабки босқичда бир қатор компаниялар билан энг замонавий технологиялардан фойдаланган ҳолда суперкомпьютер лойиҳасини амалга ошириш бўйича музокаралар ўтказилмоқда”, — дейди вазирлик.
Қозоғистон яқинда Presight АI билан суперкомпьютер яратиш бўйича шартнома имзолади. Ушбу шартнома бошқа компаниялар билан музокараларни бекор қилмайди.
“Presight ушбу лойиҳада ҳамкор бўлади, суперкомпьютерни қуриш ва ундан фойдаланиш бўйича лойиҳанинг ўзи эса барча халқаро технология компаниялари билан ҳамкорликни ўз ичига олади. Уларнинг технологияларидан фойдаланишдан тортиб, Қозоғистонда сунъий интеллектни биргаликда ривожлантиришгача”, — дейилади хабарда.
Вазирликка кўра, Қозоғистонда суперкомпьютернинг яратилиши республиканинг сунъий интеллектни ривожлантириш бўйича Марказий Осиёдаги етакчилигини белгилайди ва қўшни давлатларга ҳисоблаш қувватини ижарага бериш имкониятини беради.
- Суперкомпьютерлар бир зумда катта ҳажмдаги маълумотларни ҳисоблаб чиқишлари, олимлар ва тадқиқотчиларга иқлим маълумотларини таҳлил қилиш, об-ҳавони башорат қилиш ва ҳатто янги дори воситаларини яратишда ёрдам бериши мумкин.
Изоҳ (0)