“Қозоғистондаги Кўктўбе телеминораси зилзилага тайёр эмас” — япон олими

Япониялик олим Олмаотадаги Кўктўбе телеминораси зилзилага тайёр эмаслигини маълум қилди. Бу ҳақда Tengrinews хабар берди.

“Қозоғистонда докторлик диссертациясини ҳимоя қилган япон олими, Осака университети профессори Олмаотада зилзила кузатилиши, кўплаб бинолар сейсмик силкинишлар таъсирига тайёр эмаслигини айтди. Айниқса, у Олмаотадаги узоқ йиллар олдин қурилган ва аллақачон эски конструкцияга эга телеминорадан хавотирда.

Яъни, японлар биздан кўра Олмаота ва Қозоғистон жанубидан кўпроқ хавотирда. Чунки бизда Япониядаги каби кучли камчиликлар бор”, — дейди Қозоғистон геотехника ассоциацияси президенти Асқар Жусупбеков.

Олмаотанинг яна бир рамзи бўлган “Қозоғистон” меҳмонхонасига келсак, бу бино 70 йилларда зилзилага тайёргарлик учун синовдан ўтган. Сейсмолог меҳмонхона ҳатто саккиз баллик силкинишга ҳам бардош бера олишини таъкидлади.

“Унинг шакли овал, геометрияси туфайли жуда кучли иншоот. У аллақачон бир неча зилзилаларга чидаган. Мен бу бинода ёриқлар борлигини ҳеч эшитмаганман. Унинг пастки қисми массаси юқори қисмга қараганда кўпроқ ва шундан келиб чиқиб, тўғри қурилган. Бу жуда муҳим”, — деди сейсмолог Мухтор Ҳайдаров.

Эслатиб ўтамиз, 4 март куни Қозоғистоннинг Олмаота шаҳрида 5 магнитудали, Қирғизистонда эса 5,2 магнитудали зилзила содир бўлди. Зилзила эпитцентри Қозоғистоннинг Олмаота шаҳридан 31 км жанубда жойлашган. Унинг магнитудаси 6,1 ни ташкил қилади. Олмаотада зилзила кучи 5 баллни ташкил қилган.