Юлия Навальная Европа Иттифоқи кенгашига мурожаат йўллаб, Россиядаги сайловларни тан олмасликка чақирди.
“Путин Россия эмас. Россия Путин эмас. Бугунги кунда бутун мамлакат бўйлаб ўн минглаб одамлар ҳеч ким мажбур қилмаса ҳам, ёдгорликларга гуллар олиб келишмоқда. Уларни милиция уриб, ҳибсга оляпти, аммо таслим бўлишмаяпти. Мана бу Россия. Алексей Навальнийнинг Россияси ”, — деди сиёсатчининг беваси.
У европалик сиёсатчиларга “Алексей Навальнийнинг Россияси номидан таклифлар”ни тақдим этди.
- Биринчидан, Россияда март ойида бўлиб ўтадиган президентлик сайловларини тан олмаслик. “Асосий сиёсий рақибини ўлдирган президент қонуний бўлиши мумкин эмас”, деб ҳисоблайди Навальная.
- Иккинчиси, коррупцияга қарши курашни кучайтириш, чунки Путин “эҳтимол дунёдаги энг бой одам” ва унинг дўстлари миллиардерлардир. “Ҳа, сиз улардан баъзиларига санкция қўйдингиз, лекин миллиардерлар унчалик қийналмади. Улар энг яхши адвокатларни ёллашди ва ўзларига тегишли бўлган ҳамма нарсани оила аъзолари ва дўстларига топширишди. Бу энди уларга тегишли эмас, демак, уни олиб қўйиб бўлмайди”, деб шикоят қилди Навальная.
“Келинглар, Путиннинг дўстларини ҳақиқатан ҳам азоб чекишга ва ҳаммаси учун товон тўлашга мажбур қилайлик. Улар Украинага қарши бошлаган жиноятлари, етказган азоб-уқубатлари, даҳшатли босқинчилик уруши учун жавоб беришлари керак”, — дея қўшимча қилди у.
- Учинчидан, “Путин ва Россияни ҳар доим алоҳида кўриш керак”. “Уруш ва диктатурадан қочган одамлар сизнинг душманингиз эмас. Улар ҳамдардлик ва ҳимояга муҳтож. Уларни жазоламаслик керак, уларга ёрдам бериш керак”, деди Навальнийнинг беваси.
- Тўртинчи нуқта, сиёсатчининг жасади онасига берилмаётганига эътибор қаратиш. “Жиноятчилар изларни яширишмоқда. Яна бир бор сувдан қуруқ чиқишларига йўл қўйманг”, — деди Навальная.
Кремль матбуот котиби Дмитрий Песков Навальнаянинг бир кун аввал Владимир Путинга айтган сўзларини изоҳлар экан, “асоссиз, беадаб айбловлар” деб таъриф берганди.
Изоҳ (0)