Болгария Мудофаа вазирлиги Украинага 100 дона БТР етказиб бериш учун НАТОдан маблағ сўрашига тўғри келди ва ҳозирча бу қуролларни Киевга топшириш кейинроққа қолдирилди, деб ёзади Euractiv.
“Болгария ёрдам бериши мумкин, аммо бу жараён керакли тезликда кетмаяпти, умид қиламанки, вазият яхшиланади. Биз зирҳли транспорт воситаларини етказиб беришга деярли уч ой аввал овоз берган эдик, бироқ уч ой ичида юзта БТРни Софиядан Русега олиб ўта олмадик”, — дея тушунтирди ҳукмрон коалиция ўринбосари Ивайло Мирчев.
У Болгария Мудофаа вазирлигининг иш шароитлари оптимал эмаслигидан шикоят қилди.
18 февраль куни мудофаа вазири Тодор Тагарев БТРларни жўнатиш кечикишига ушбу ҳарбий техникани ташиш билан боғлиқ муаммо сабаб бўлганини айтди. Вазир “бу оддий транспорт эмас, уни ташиш жуда кўп юк поездларини талаб қилади”, деб таъкидлади.
8 август куни Софияда ва 13 ноябрда Киевда вазирлар даражасида Украинага Болгария зирҳли техникаларини текин етказиб бериш бўйича келишув имзоланган эди. Аммо январь ойи ўрталарида Болгария Миллий радиоси Болгария Украинага ваъда қилинган бронетранспортёрларни етказиб бера олмагани ҳақида хабар берди, чунки етказиб бериш харажатлари НАТОга аъзо давлатлар томонидан қопланиши режалаштирилган.
Euractiv эслатишича, аввалроқ Болгария Украинага СССР давридаги қуроллар — зирҳли транспортёрлар, С-300 зенит-ракета комплекслари қисмлари, эски С-300 ракеталари, снарядлар ва миномётлар етказиб беришга ваъда берган.
Изоҳ (0)