Ўзбекистон ва АҚШ ҳукуматлари Афғонистонга гуманитар ёрдам кўрсатишни мувофиқлаштиришни давом эттириш ниятида. Бу ҳақда Ташқи ишлар вазирлиги матбуот хизмати хабар берди.
Маълум қилинишича, Ўзбекистон президентининг Афғонистон бўйича махсус вакили Исматулла Иргашев Тошкентда АҚШ Конгресси Сенатининг Ташқи алоқалар қўмитасининг катта ходими Шарлотт Олдҳем-Мур билан учрашган.
Суҳбат чоғида кун тартибидаги долзарб масалалар юзасидан фикр алмашилган. Хусусан, АҚШ Конгреси Сенати вакили Афғонистонда кенг вакилликка асосланган ҳукумат тузиш, шунингдек, Марказий Осиё давлатлари ва жаҳон ҳамжамиятининг ушбу мамлакатдаги хотин-қизлар ҳуқуқларини таъминлаш борасидаги саъй-ҳаракатларини мувофиқлаштириш зарурлигини таъкидлаган.
Шунингдек, томонлар Ўзбекистон ва АҚШнинг Афғонистонга гуманитар ва бошқа ёрдам кўрсатиш бўйича ҳаракатларини янада мувофиқлаштириш муҳимлигини қайд этган.
Шавкат Мирзиёев 19 июль куни Марказий Осиё мамлакатлари ва Кўрфаз араб давлатлари ҳамкорлик кенгаши етакчиларининг биринчи саммитида Афғонистонда тинчликка эришиш масалаларига тўхталиб ўтганди. “Бизнинг минтақаларимиз ташаббускор бўлиб, катта-катта минбарлардан Афғонистон муаммоларига бутун дунё эътиборини жалб этишимиз, афғон халқининг ҳаётини енгил қилишга муносиб ҳисса қўшишимиз керак”, — деган эди давлат раҳбари.
Изоҳ (0)