Афғонистонда “Толибон” ҳаракати Бош бошқармаси расмийлари Ўзбекистон делегацияси билан автотранспорт воситаларини таъмирлаш устахоналарини ташкил этиш бўйича ўзаро келишув имзолади. Бу ҳақда Bakhtar News хабар бермоқда.
Нашр “Толибон” Бош бошқармаси матбуот хизматига таяниб ёзишича, бошқарманинг назорат ва сиёсат бўйича директор ўринбосари маулви Сайфуддин Таиб Ўзбекистоннинг Кобулдаги элчиси Ёдгорхўжа Шодмонов, савдо ва саноат вазири биринчи ўринбосари Нозимжон Холмурадов ҳамда бошқа расмийлари билан учрашган.
Учрашувдан сўнг фуқаролик ва ҳарбий транспорт воситаларини таъмирлаш устахоналарини ташкил этиш бўйича ҳамкорлик келишуви имзоланган.
Хабарда айтилишича, учрашувда Ўзбекистон делегацияси “Толибон”нинг савдо ва дипломатик ҳамкорлик йўналишидаги ҳаракатларини олқишлаб, Ўзбекистон қўшни Афғонистон давлати билан ҳар қандай ҳамкорликка тайёр эканини билдирган.
Эслатиб ўтамиз, 26—27 август кунлари Ўзбекистон президентининг Афғонистон бўйича Махсус вакили Исматулла Иргашев бошчилигидаги делегациянинг Афғонистонга сафари амалга оширилди. Ўзбекистон расмийлари ва “Толибон” вакиллари билан ўтказилган учрашувларда Афғонистон бўйлаб транзит ўтишга ўрнатилган чекловни олиб ташлаш масаласи муҳокама қилинди.
Изоҳ (0)