Наманган вилоят суди Иқтисодий ишлар бўйича судлов ҳайъати тафтиш инстанциясининг 2024 йил 12 февралдаги қарори билан “Наманган халқаро нодавлат университети” МЧЖ лицензияси бекор қилингани тўғрисидаги қарор ўзгаришсиз қолдирилди. Бу ҳақда Олий таълим, фан ва инновациялар вазирлиги хабар берди.
Қайд этилишича, ижтимоий тармоқларда Наманган халқаро университетининг талабалари мажбурий тарзда Тошкент кимё халқаро университетига кўчирилаётгани ҳақида асоссиз хабарлар тарқалмоқда.
Олий таълим, фан ва инновациялар вазирлиги ушбу хабар мутлақо ҳақиқатга мос келмаслигини билдириб, лицензияси бекор қилинган “НамХУ ОТМ” МЧЖнинг талабалари ўқишини аризасига мувофиқ белгиланган тартибда олий таълим ташкилотларига кўчирилиши Олий таълим, фан ва инновациялар вазирлигининг Ишчи гуруҳи томонидан олиб борилаётганини маълум қилди. “Жараён тўлиқ назоратга олинган”, — дейилади хабарда.
Таъкидланишича, талабаларнинг ўқишини кўчириш уларнинг аризаларига кўра ташкил этилмоқда. Бирор талаба мажбурлаб бошқа олийгоҳга кўчирилмайди.
Эслатиб ўтамиз, 2023 йил июль ўрталарида Олий таълим, фан ва инновациялар вазирлиги Ат-Термизий номидаги халқаро университетга олий таълим хизматларини кўрсатиш учун лицензия берилмаганини маълум қилганди. “Таълим тўғрисида”ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Изоҳ (0)