Еврокомиссия раҳбари Урсула фон дер Ляйен Европа Иттифоқи Россиянинг қазилма ёқилғисидан воз кечаётганини эълон қилди. Унинг қўшимча қилишича, Путиннинг энергетика “шантажи” Европа Иттифоқини фақат яшил иқтисодиётга ўтиш сари ундаган. Бу ҳақда Euronews хабар берган.
Россия Украинага уруш эълон қилишидан олдин, Европа Иттифоқининг Россиянинг қазилма ёқилғисига, айниқса, газ импортига эҳтиёжи юқори бўлган. Аммо уруш сабабли Европа Иттифоқига аъзо давлатлар Россия ёқилғисидан санкциялар (нефть ва кўмир бўйича) ва Кремлни муҳим даромад манбаидан маҳрум этишга қаратилган миллий ташаббуслар (газ) орқали воз кечишга қарор қилган.
Икки йил олдин Европа Иттифоқида истеъмол қилинадиган ҳар беш бирлик энергия Россиянинг қазилма ёқилғисига тўғри келган. Бугун эса бу кўрсаткич ҳар йигирматадан биттани ташкил этади, — деди Еврокомиссия раиси 13 февраль куни Парижга қилган ташрифи чоғида.
Шунингдек, у Путиннинг “ёқилғи шантажи” бутунлай муваффақиятсиз тус олгани, аксинча, у яшил иқтисодиётга ўтишга туртки бўлганини қўшимча қилган. Еврокомиссиянинг сўнгги маълумотларига кўра, ЕИнинг Россия газига қарамлиги 2021 йилдаги 45 фоиздан 2023 йилда 15 фоизга тушган, яъни унинг истеъмоли сезиларли даражада камайган, лекин бутунлай тўхтаганича йўқ. Европаликларнинг Россия газини Марказий Европадаги қувурлар орқали ёки Франция, Бельгия ва Испаниядаги суюлтирилган табиий газ терминаллари орқали иштиёқ билан сотиб олишда давом этиши аъзо давлатлар ўртасида доимий тортишувларга сабаб бўлмоқда.
Изоҳ (0)