Россия ҳозирда Европанинг бошқа давлатларига ҳужум қилиш учун қулай ҳолатда — у кўпроқ кучга, ҳарбий тажрибага эга ва хатоларини тузатмоқда. Бу ҳақда Литва Мудофаа вазирлигининг мудофаа сиёсати директори Вайдотас Урбелис Business Insider’га маълум қилди.
Унинг сўзларига кўра, муваффақиятсизликларга қарамай, Россия Украинага бостириб киришдан кўра бўлажак ҳужумга яхши тайёрланган кўринади.
Эндиликда улар кенг кўламли уруш олиб бориш тажрибасига эга, буни режанинг бир қисми сифатида кўриш керак. Агар фақат рақамларга эътибор қаратсангиз, Россия қуролли кучларида ҳозир босқиндан олдингидан кўпроқ одам борлигини кўрасиз, — дейди Литва Мудофаа вазирлиги расмийси.
У Россия техникалари бўйича йўқотишга учраётганига қарамай, тезда тиклана олишини қўшимча қилди.
Шунинг учун Литва тайёр бўлиши керак, чунки Россия уни ва унинг қўшни ҳудудларини “ўз соҳасининг бир қисми” деб билади, — дейди амалдор.
Урбелисга кўра, Литва тезда жавоб қайтаришга тайёр бўлиши ва “НАТО механизми ишлаб кетгунича” кутмаслиги керак. Гап Литвага альянс қўшинларини жойлаштириш, мудофаа харажатларини ошириш ва чегара хавфсизлигини мустаҳкамлаш ҳақида кетмоқда.
Ҳарбийнинг қўшимча қилишича, Россиянинг Украинага бостириб кириши НАТОни мустаҳкамлаган, НАТО аъзоларини эса мудофаа фаолиятини кучайтиришга чақирган.
Альянс сифатида биз тўғри йўлдамиз деб ўйлайман. Лекин етарлича тезкор эмас, — дея хулоса қилди Урбелис.
Изоҳ (0)