Яман шимолидаги ҳукмрон Ансор Аллоҳ шиа ҳаракати Исроил Ғазо секторидаги операциясини тўхтатмаса, кучли зарбалар беришга тайёр эканини билдирди. Бу ҳақда ҳусийлар матбуот котиби Муҳаммад ал-Буҳайти ITV телеканалига берган интервьюсида маълум қилди, дейилади РИА хабарида.
Шу билан бирга, ҳусий вакили эскалациянинг кўплаб вариантлари мавжуд эканлигини таъкидлаб, Буюк Британия ва Қўшма Штатлари, хусусан, мазкур давлатларнинг элчихоналари ва базаларига имкон қадар ҳужум қилиш режалаштирилаётганини қўшимча қилган.
Агар бизда АҚШ ва Буюк Британияга етиб бора оладиган ракета ва жанговар самолётларимиз бўлганида, улар Яманга ҳужум қилишда давом этса, иккиланмасдан зарба берардик, — дейди ал-Буҳайти.
Қизил денгиз соҳилларининг катта қисмини назорат қилувчи Яман шимолидаги ҳукмрон ҳусийлар ҳаракати аввалроқ Исроил билан алоқадор ҳар қандай кемага ҳужум қилиш нияти ҳақида огоҳлантирган ва бошқа давлат экипажларини денгизда уларга яқинлашмасликка чақирган эди. Араб ва мусулмон давлатлари АҚШ Исроилнинг Ғазо секторидаги ҳаракатларини сўзсиз қўллаб-қувватлаши можаронинг бутун минтақага тарқалишига олиб келиши ҳақида бир неча бор огоҳлантирган.
АҚШ ва Буюк Британия январь ойи ўрталаридан бери ҳусий объектларига зарбалар бериб, буни Қизил денгизда ҳаракатланаётган кемаларга нисбатан таҳдидларга жавоб деб атамоқда.
Изоҳ (0)