Yevrokomissiya rahbari Ursula fon der Lyayen Yevropa Ittifoqi Rossiyaning qazilma yoqilg‘isidan voz kechayotganini e’lon qildi. Uning qo‘shimcha qilishicha, Putinning energetika “shantaji” Yevropa Ittifoqini faqat yashil iqtisodiyotga o‘tish sari undagan. Bu haqda Euronews xabar bergan.
Rossiya Ukrainaga urush e’lon qilishidan oldin, Yevropa Ittifoqining Rossiyaning qazilma yoqilg‘isiga, ayniqsa, gaz importiga ehtiyoji yuqori bo‘lgan. Ammo urush sababli Yevropa Ittifoqiga a’zo davlatlar Rossiya yoqilg‘isidan sanksiyalar (neft va ko‘mir bo‘yicha) va Kremlni muhim daromad manbaidan mahrum etishga qaratilgan milliy tashabbuslar (gaz) orqali voz kechishga qaror qilgan.
Ikki yil oldin Yevropa Ittifoqida iste’mol qilinadigan har besh birlik energiya Rossiyaning qazilma yoqilg‘isiga to‘g‘ri kelgan. Bugun esa bu ko‘rsatkich har yigirmatadan bittani tashkil etadi, — dedi Yevrokomissiya raisi 13-fevral kuni Parijga qilgan tashrifi chog‘ida.
Shuningdek, u Putinning “yoqilg‘i shantaji” butunlay muvaffaqiyatsiz tus olgani, aksincha, u yashil iqtisodiyotga o‘tishga turtki bo‘lganini qo‘shimcha qilgan. Yevrokomissiyaning so‘nggi ma’lumotlariga ko‘ra, YIning Rossiya gaziga qaramligi 2021-yildagi 45 foizdan 2023-yilda 15 foizga tushgan, ya’ni uning iste’moli sezilarli darajada kamaygan, lekin butunlay to‘xtaganicha yo‘q. Yevropaliklarning Rossiya gazini Markaziy Yevropadagi quvurlar orqali yoki Fransiya, Belgiya va Ispaniyadagi suyultirilgan tabiiy gaz terminallari orqali ishtiyoq bilan sotib olishda davom etishi aʼzo davlatlar o‘rtasida doimiy tortishuvlarga sabab bo‘lmoqda.
Izoh (0)