Azim Ahmedxo‘jayev O‘zbekiston axborot texnologiyalari va kommunikatsiyalarni rivojlantirish vaziri lavozimidan ozod etildi. Bu haqda, hukumatdagi manbalarga asoslanib, “Gazeta.uz” xabar bermoqda.
Uning o‘rniga Shuhrat Muhammadjonovich Sodiqov vazirlik rahbari etib tayinlangan. Shuhrat Sodiqov bungacha O‘zbekiston Prezidenti huzuridagi Loyiha boshqaruvi milliy agentligi (LBMA)ga direktorlik qilgan.
Azim Ahmedxo‘jayev endi Prezident farmoni bilan LBMAda tashkil etilgan yangi — Iqtisodiyot va blokcheynni rivojlantirish bo‘yicha blokni boshqaradi.
Shuhrat Sodiqov (1969-yilda tug‘ilgan) 2010 yildan Vazirlar Mahkamasida Axborot tizimlari va telekommunikatsiyalar masalalari bo‘yicha axborot-tahlil departamenti mudiri bo‘lib ishlagan. Avvalroq, 2008—2010-yillarda “O‘zbektelekom” kompaniyasi bosh direktori, 2006—2008-yillarda shu kompaniya bosh direktori o‘rinbosari sifatida faoliyat ko‘rsatgan.
Azim Ahmedxo‘jayev (1979-yilda tug‘ilgan) — Toshkent davlat axborot texnologiyalari universiteti bitiruvchisi (2002-yil). 2017—2018-yillarda Investitsiyalar bo‘yicha davlat qo‘mitasiga rahbarlik qilgan. 2016-yil mayidan 2017-yil martiga qadar “Asaka-bank” boshqaruvi raisi, bungacha — 2011-yil mayidan Milliy bank boshqaruvi raisi o‘rinbosari, raisning birinchi o‘rinbosari lavozimlarida ishlagan. Bundan avval — 2009-yil yanvaridan Milliy bankning NBU Invest Group shu’basiga raislik qilgan. Bungacha Iqtisodiyot vazirligi hamda O‘zbekiston tiklanish va taraqqiyot jamg‘armasi tuzilmalarida ishlagan.
Izoh (0)