Shuhrat Sodiqov bosh vazir kotibiyati rahbari lavozimiga tayinlandi. Bu haqda bosh vazir matbuot kotibi xabar berdi.
Tayinlovga qadar u bosh vazir kotibiyati rahbarining o‘rinbosari lavozimida ishlab kelayotgan edi.
Shuhrat Sodiqov (1969-yilda tug‘ilgan) 2010-yildan Vazirlar Mahkamasida Axborot tizimlari va telekommunikatsiyalar masalalari bo‘yicha axborot-tahlil departamenti mudiri bo‘lib ishlagan. Avvalroq 2008—2010-yillarda “O‘zbektelekom” kompaniyasi bosh direktori, 2006—2008-yillarda shu kompaniya bosh direktori o‘rinbosari sifatida faoliyat ko‘rsatgan.
Shuhrat Sodiqov 2018-yilning avgustidan 2021-yilning noyabrigacha AKT vaziri lavozimida ishlagan. O‘zbekistonda Telegram, YouTube, Instagram, Facebook, “Odnoklassniki” kabi tarmoqlar vaqtincha cheklanishi ortidan prezident farmoni bilan lavozimidan ozod etilgandi.
2021-yil 3-noyabr kuni Axborotlashtirish va telekommunikatsiyalar sohasida nazorat bo‘yicha davlat inspeksiyasi (“O‘zkomnazorat”) Telegram, YouTube, Instagram, Facebook, “Odnoklassniki”ning O‘zbekistondagi faoliyatini cheklagani haqida xabar berilgandi.
Shundan so‘ng, Prezident matbuot kotibi Sherzod Asadov “O‘zkomnazorat”ning bir yoqlama, uzoqni o‘ylamay qilgan harakatidan davlat rahbari xabar topganini ma’lum qildi. Axborotlashtirish va telekommunikatsiyalar sohasida nazorat bo‘yicha davlat inspeksiyasi boshlig‘i G‘olibsher Ziyayev esa noto‘g‘ri va kelishilmagan xatti-harakatlari uchun egallab turgan vazifasidan chetlatildi.
U 2023-yil fevraldan buyon Milliy teleradiokompaniya (MTRK) raisi lavozimiga tayinlangan Abdurashid Jo‘raboyevga o‘rinbosarlik qilib kelayotgan edi.
Izoh (0)