Ўзбекистоннинг Жиддадаги Бош консуллигида Саудия Арабистонининг Al-Zafer Hospital шифохонаси бош координатори Зоҳаир Ҳебаҳ билан учрашув ўтказилди. Бу ҳақда “Дунё” хабар берди.
Унда Ўзбекистон фуқароларини хорижда уюшган ҳолда иш билан таъминлаш масалалари муҳокама қилинди. Мулоқот аввалида Ўзбекистонда соғлиқни сақлаш соҳасини тубдан такомиллаштириш, тиббий хизмат кўрсатиш ва таълим сифати ва самарадорлигини ошириш, малакали тиббий кадрлар тайёрлаш, соҳага янги бошқарув усулларини жорий этиш ҳамда жамиятда соғлом турмуш тарзини шакллантириш борасида олиб борилаётган кенг кўламли ишлар ҳақида маълумотлар Саудия вакили эътиборига тақдим қилинди.
Зоҳаир Ҳебаҳнинг айтишича, Ўзбекистонда тиббиёт соҳаси жадал суръатлар билан ривож топиб бормоқда. Шунингдек, ўзбек шифокорларининг билим ва тажрибаси ҳеч бир хорижий давлатларнинг етакчи тиббиёт вакилларидан кам эмаслиги таъкидланди.
“Аксарият араб давлатларида, жумладан, Саудия Арабистонида ҳам Ўзбекистондан келган тажрибали ва малакали шифокорлар самарали фаолият юритиб келмоқда. Al-Zafer Hospital мажмуасида хорижий шифокорлар ва ҳамшираларга эҳтиёж мавжуд. Биз ушбу бўш ўринларга Ўзбекистондан малакали мутахассисларни ишга таклиф этишдан мамнунмиз”, — дейди у.
Учрашув якунида томонлар билдирилган таклифларни Ўзбекистоннинг тегишли вазирлик ва идоралари ходимлари билан биргаликда муҳокама қилишга келишиб олди.
Изоҳ (0)