Қозоғистон Қирғизистонга электр энергияси етказиб беришни оширди. Бу ҳақда Қозоғистон Ташқи ишлар вазирлиги хабар берди.
Қирғизистон ташқи ишлар вазири Жеенбек Кулубаев қозоғистонлик ҳамкасби Мурат Нуртлеуга республикага Жамбил давлат электр станциясидан электр энергияси етказиб бериш ҳажмини оширгани учун миннатдорлик билдирган.
Қирғизистон ташқи сиёсат бўлими бошлиғи иссиқлик электр станцияси фаолиятини тиклаш бўйича кўрилаётган чора-тадбирлар ҳақида маълумот берди, шунингдек, Қозоғистон томонидан кўрсатилаётган қўллаб-қувватлаш ҳамда электр энергияси етказиб бериш ҳажмини ошириш билан боғлиқ масала тезкорлик билан ҳал этилгани учун миннатдорлик билдирди, — дейилади хабарда.
Аниқлик киритилишича, Мурат Нуртлеу республика президенти Қосим-Жўмарт Тўқаев номидан қирғизистонлик ҳамкасби билан музокаралар олиб борган. Суҳбат чоғида Бишкек иссиқлик электр станцияси атрофидаги вазиятни ҳал қилишда икки томонлама ҳамкорлик масалалари муҳокама қилинган.
Бишкекдаги ИЭС портлаши
2 февралга ўтар кечаси Бишкекдаги иссиқлик электр станциясида портлаш юз берди. Маҳаллий вақт билан соат 03:06 да воқеа жойига ўт ўчириш бригадалари чақирилган. Ёнғин соат 05:05 да ўчирилган.
Ҳодиса оқибатида 5 киши жабрланган, улардан икки нафари амбулатор даволанишга юборилган. Яна икки нафари куйиш жароҳати билан реанимацияда оғир аҳволда. ИЭСдаги авария туфайли Бишкекдаги 2493 та кўп қаватли уй иссиқлик ва иссиқ сувсиз қолган. Фуқароларга иссиқ сув ва иссиқлик учун тўловларни қайта ҳисоблаш ваъда қилинган.
Фавқулодда вазиятлар вазирлиги воқеанинг иккита версиясини кўриб чиқмоқда, улардан бири қўпорувчилик. Пойтахтдаги барча мактаблар душанба кунигача онлайн таълимга ўтди, бугун болалар боғчалари ҳам ёпиқ.
Ҳодиса сабаблари ўрганилмоқда. Садир Жапаров Бишкек иссиқлик электр станциясидаги вазиятни шахсан назоратга олган. У воқеа жойига ташриф буюрган ва ҳамма нарсани имкон қадар тезроқ тиклашни буюрган. 2 февраль куни кечқурун Бишкекда иссиқлик ва иссиқ сув таъминоти қисман тикланди.
Изоҳ (0)