Ўзбекистон ташқи ишлар вазири Бахтиёр Саидов Қирғизистон ташқи ишлар вазири Жеенбек Кулубаев билан телефон орқали мулоқот қилди. Бу ҳақда қўшни давлат ташқи сиёсий идораси матбуот хизмати хабар берди.
Қайд этилишича, мулоқот давомида Бахтиёр Саидов президент Шавкат Мирзиёевнинг топшириғига биноан Ўзбекистон Бишкекдаги ИЭСда юз берган авария сабаб Қирғизистонга зарур ёрдамни кўрсатишга тайёрлигини билдирган.
“Хусусан, Ўзбекистон томони ёрдам сифатида Андижондан Ўш шаҳрига суюлтирилган газ баллонлари юборилишини маълум қилди. Ўз навбатида Қирғизистон ташқи ишлар вазири Жеенбек Кулубаев қўшни биродарларча гуманитар ёрдам кўрсатишга тайёр мамлакатга самимий миннатдорлик билдирди”, — дейилади хабарда.
Бишкекдаги ИЭС портлаши
2 февралга ўтар кечаси Бишкекдаги иссиқлик электр станциясида портлаш юз берди. Маҳаллий вақт билан соат 03:06 да воқеа жойига ўт ўчириш бригадалари чақирилган. Ёнғин соат 05:05 да ўчирилган.
Ҳодиса оқибатида 5 киши жабрланган, улардан икки нафари амбулатор даволанишга юборилган. Яна икки нафари куйиш жароҳати билан реанимацияда оғир аҳволда. ИЭСдаги авария туфайли Бишкекдаги 2493 та кўп қаватли уй иссиқлик ва иссиқ сувсиз қолган. Фуқароларга иссиқ сув ва иссиқлик учун тўловларни қайта ҳисоблаш ваъда қилинган.
Фавқулодда вазиятлар вазирлиги воқеанинг иккита версиясини кўриб чиқмоқда, улардан бири қўпорувчилик.
Пойтахтдаги барча мактаблар душанба кунигача онлайн таълимга ўтди, бугун болалар боғчалари ҳам ёпиқ.
Ҳодиса сабаблари ўрганилмоқда. Садир Жапаров Бишкек иссиқлик электр станциясидаги вазиятни шахсий назоратига олган. У воқеа жойига ташриф буюрган ва ҳамма нарсани имкон қадар тезроқ тиклашни буюрган.
Изоҳ (0)