“Толибон” вазири Ўзбекистон ДХХ раиси билан учрашувда чегараларни мустаҳкамлашга аҳд қилинганини айтди

Ўзбекистон Давлат хавфсизлик хизмати раиси Абдусалом Азизов “Толибон” мудофаа вазири вазифасини бажарувчи Муҳаммад Ёқуб билан учрашгани хабар қилинганди. Etilaatroz учрашувнинг қўшимча тафсилотларни ёзди.

Учрашувда Муҳаммад Ёқуб “ўтган йилларда мамлакат чегараларида кўп ишлар амалга оширилгани ва келгусида чегараларни мустаҳкамлаш бўйича кўпроқ ишларни амалга оширишга аҳд қилингани” ҳақида гапирди.

“Толибон” расмийси Азизовни “Толибон” кучлари Афғонистонга қўшни давлатларнинг ривожланиш лойиҳалари хавфсизлигини таъминлашига ишонтирган.

Шунингдек, “Толибон” Мудофаа вазирлиги Ўзбекистон билан турли соҳаларда алоқаларни мустаҳкамлаш ва ҳамкорликни давом эттириш ниятини тасдиқлаган.

Шу билан бирга, “Толибон” Афғонистон устидан назоратни тиклаганидан кейин қўшни давлатлар, жумладан, Эрон ва Покистон чегара кучлари билан бир неча бор тўқнашди.
Бошқа томондан, Афғонистон билан чегарадош давлатлар у ердан террорчи гуруҳларнинг кириб келишидан хавотирда. Афғонистонга қўшни қатор давлатлар, жумладан, Покистон ва Тожикистон ушбу мамлакатдан кириб келган террорчиларни ҳибсга олгани ёки ўлдирганини бир неча бор даъво қилган.