Финляндия бош вазири Петтери Орпо мамлакат яқин келажакда Россия билан чегарада назорат пунктларини очолмаслигини айтди. Аввалроқ Финляндия расмийлари назорат-ўтказиш пунктлари 11 февралгача ёпилишини айтган эди.
“Бизнинг тушунишимизча, шарқий чегара ортида Финляндияга ноқонуний равишда келишни мақсад қилган одамлар бор. Чегараларнинг ёпилишини бекор қила олмаслигимиз аниқ”, — деди Петтери Орпо Yle TV телеканалига берган интервьюсида.
Унинг қўшимча қилишича, минглаб одамлар Россиядан Финляндияга киришни хоҳлашади. Бош вазирнинг сўзларига кўра, расмийлар чегара очилгунга қадар ноқонуний миграцияга чек қўйиш чораларини ишлаб чиқиши керак.
Финляндия ҳукумати 2023 йил ноябрь ойи ўрталарида Россия билан чегарадаги назорат-ўтказиш пунктлари фаолиятини чеклашни бошлади ва йил охиригача уларнинг барчасини ёпиб қўйди. 11 январь куни назорат-ўтказиш пунктининг ёпилиши 11 февралгача узайтирилди.
Финляндия ҳукумати бундай чораларни Россия ҳудудидан келаётган ноқонуний мигрантларнинг кўплиги билан изоҳлади.
Изоҳ (0)