Финляндияда президентлик сайловининг биринчи босқичи учун сайлов участкалари очилди. Бу ҳақда “Интерфакс” хабар берди.
Финляндияда президентлик сайловлари маҳаллий вақт билан соат 9:00 да бошланди. Биринчи турда ғалаба қозониш учун номзодлардан бири 50 фоиздан кўпроқ овоз олиши керак. Давлат раҳбари лавозимига 9 нафар номзод даъвогарлик қилмоқда.
Сўров натижалари шуни кўрсатадики, номзодларнинг ҳеч бири биринчи турда керакли фоизга чиқа олмайди ва катта эҳтимол билан иккинчи турда мамлакат президенти аниқланади.
Асосий даъвогарлар — ҳукмрон Миллий коалициядан собиқ бош вазир Александр Стубб ва “Яшил иттифоқ”дан собиқ ташқи ишлар вазири Пекка Ҳаависто.
Тадқиқотга кўра, респондентларнинг 27 фоизи Стуббни ёқлайди, финларнинг 23 фоизи эса собиқ вазир Ҳаависто учун овоз беришга тайёр. Энг оммабоп номзодлар орасида учинчи ўринда Европа Иттифоқини танқид қилувчи ўта ўнгчи “Ҳақиқий финлар” партияси етакчиси Юсси Ҳалла-ахо бор.
Финляндияда президент 6 йилга, кетма-кет икки муддатдан кўп бўлмаган муддатга сайланади. Амалдаги президент Саули Ниинистё учинчи муддатга сайлана олмайди. Ҳокимиятга янги, 13-давлат раҳбари келади.
Изоҳ (0)