Шимолий Корея янги “ултра-катта” каллаклар ва янги турдаги зенит-ракета билан жиҳозланган қанотли ракеталарни синовдан ўтказганини маълум қилди.
2 февраль куни Жанубий Корея ҳарбийлари Шимолдан қанотли ракеталар учирилгани ҳақида хабар берганди. 3 февраль куни Шимолий Корея давлат матбуоти бу “ултра-катта” каллакларга эга ракеталар бўлганини хабар қилди.
“2 февраль куни Ракета фанлари бош бошқармаси Сариқ денгизда қанотли ракетанинг ўта йирик жанговар каллаги кучини синовдан ўтказди, шунингдек, янги зенит-ракета синовдан ўтказилди”, — дейилади Корея Марказий телеграф агентлиги хабарида.
Шимолий Корея қанотли ракеталар учун каттароқ каллаклар ишлаб чиқилишини эълон қилиш орқали ракеталар ядро қуроли билан қуролланишга мўлжалланганини таъкидлаётган бўлиши мумкин, деб ёзади ABC News.
Шимолий Кореянинг расмий марказий ахборот агентлиги синовдан ўтган ракеталар сони ва уларнинг ишлаши тафсилотларига аниқлик киритмади. Агентликнинг таъкидлашича, синовлар мамлакатнинг “ҳарбий ривожланишни жадаллаштириш бўйича мунтазам фаолияти”нинг бир қисми бўлиб, қўшниларининг хавфсизлигига таъсир қилмаган.
Жанубий Корея ҳарбийлари КХДРдан бўлаётган “провокация белгилари”ни кузатиш учун Қўшма Штатлар билан яқиндан мувофиқлашганини хабар қилди. Yonhap агентлиги бу парвоз йил бошидан бери Шимолий Корея ҳарбийлари томонидан қанотли ракеталарнинг тўртинчи учирилиши эканини эслатди.
Изоҳ (0)