Қашқадарё ва Наманган вилоятларида ноқонуний равишда ишга жойлаштириб қўйишни ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Қарши туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда З.А. исмли шахс фуқаро М.Ш.нинг ишончига кириб, уни юқори лавозимда ишловчи танишлари ёрдамида 1,5 минг доллар эвазига туман тиббиёт бирлашмасига ишга жойлаштириб қўйишини айтиб, ушбу пуллар ҳисобидан 18,5 миллион сўмни олган вақтида ашёвий далиллар билан ушланган.
Шу каби, департаментнинг Поп туман бўлими томонидан ўтказилган тезкор тадбирда А.И. исмли шахс фуқаро Т.У.нинг ишончига кириб, унинг фарзандини “Ўзбекистон темир йўллари” АЖга қарашли Поп туман темирйўл корхонасига ишга жойлаштириб қўйиши эвазига 2,5 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Изоҳ (0)