Қорақалпоғистон Республикаси ва Навоий вилоятида пул эвазига ишга жойлаштириб қўйишни ваъда қилган шахслар қўлга олинди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Тахиатош туман бўлими томонидан ИИВ ходимлари билан ҳамкорликда тезкор тадбир ўтказилган. Тадбирда А.Т. исмли шахс фуқаро Д.Е.нинг ишончига кириб, уни гўёки юқори лавозимда ишловчи танишлари ёрдамида Қорақалпоқ давлат университетига ишга жойлаштириб қўйишини айтган ва эвазига 20 миллион сўмни фирибгарлик йўли билан олган вақтида ашёвий далиллар билан ушланган.
Шу каби, департаментнинг Кармана туман бўлими томонидан вилоят ИИБ ходимлари билан ҳамкорликда ўтказилган тезкор тадбирда Ж.Э. исмли шахс (муқаддам судланган) фуқаро С.Б.нинг ишончига кириб, уни танишлари ёрдамида 1,2 минг доллар эвазига “Э.Э.” хорижий корхонасига ишга жойлаштириб қўйишини айтгани аниқланди. У келишилган пулдан 3,6 миллион сўмини қўлга киритиб, 900 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Изоҳ (0)